Гүлдана Мұқан, guldanamukanova
Оған енді бәрібір. Қазақ музыка кеңістігінде жаңа есім. Аруларға «Мені күт» деп тыныштық сұрайтын, сосын «Сеннен кейін» деп жыр жазатын бұл музыканттың шығармалары эмоциялық тебіреніске толы. Бүгін дебютант Ернар Амандықтың соло кешіндеміз.
Ернар Амандық лирикалық әндерімен тыңдарман жүрегіне жол тауып, фанбазасын қалыптастырып келеді. Ақырын жүріп анық басып келе жатқан өнерпаз «Сегіз қырлы, бір сырлы» болып шықты. Ол әуезді ән айтумен қатар, театр сахнасы мен кино кеңістікте де өзін танытып жүр
Ернар Амандық, музыкант, актер:
– Кино, музыка немесе театр?
– Бәрі, көптен армандаған едім, орындалды. Киноны да жақсы көремін, әнді де, театрды да.
Десе де Ернар концерт беруге ұзақ ойланған сыңайлы. Өнер иесін әрдайым қолдайтын әріптестері бұл концерттің жүзеге асуына ықпал еткен.
Ернар Амандық, музыкант, актер:
– «Қашанғы жүре бересің осылай театрда ән айтып? Жеке концертіңді бер. Сен қорықпа, адамдар келеді» деп, жақындарым үнемі жігер беріп жүретін.
Репертуары махаббат жайлы әндерге толы сері шығармаларының мәтінінде өзі жазады екен. Ал Амандықтегі пәк сезімнен туылған тректер шынайы оқиғаға негізделгенін жасырмады.
Ернар Амандық, музыкант, актер:
– Иа, бұның барлығы шынайы оқиғаға құрылған әндер ғой,бір жан болды. Сол кісіге әндер шықты. Одан кейін тағы бір жанды кездестірдік. Ол кісіге де әндер шықты.
– Залға сол жандардың бәрін жинап алған жоқсыз ба?
– Білмеймін... Жоқ, ешкімді шақырған жоқпын.Әркімнің өзінің қалауына қойдым. Келгісі келсе енді келетін шығар деп...
Иә, дебютанттың шығармашылығын бағалайтын жанашырлары жетерлік. Артист үшін маңызды күнде оның жақын достары да табылды. Олардың қатарында актриса Бақытгүл Серікбаева бар:
Бақытгүл Серікбаева, актриса:
– Енді оның әндері өзіне қарағанда танымалырақ, сондықтан мен өте қуаныштымын, жеке шығармашылық кешін беруге шешім қабылдағанына.
Актерлік өнерді шығармашылығымен қатар алып жүрген өнер иесі режиссерлерге жиі өтініш білдіретін көрінеді.
Бақытгүл Серікбаева, актриса:
– Театрда жиі ән айтады және ол «Мен актер болайыншы, әнші емес» деген сияқты режиссерлерге де сондай ұсыныс айтады. Әнге қатысы бар қойылымдар болса міндетті түрде Ернарды алады.
– Драмалық сахналарды оқығым келеді, әннен гөрі. Театрда солай жүргенді қалаймын.
Ернар Амандық, музыкант, актер:
– Мені бақылап жүріңіздер. Мен қазір өте белсенді ізденістемін! Алда көптеген жақсы жаңалықтар бар. Сол жақсы жаңалықтарымды тек бақылап , назардан тыс қалдырмаңыздар. Рақмет!
Ернардың әндері бүгінде бірқатар платформалардың тренд бөлімінде көш бастап тұр. Жан тебірентер әндердің авторы шығармашылығын одан әрі тоқтатпайды деген үміттеміз. Аншлагпен басталған соло кеш үлкен аренаға жалғассын!
