Республика сарайында заманауи музыканың мықтылары жиналып, өзара үздіктерді анықтады. Таланттар алдымен қызыл кілемнен өтіп, қызу бәсекеге қатысты ойларымен бөлісті.

Arshat, музыкант:

– Аршат, үздік альтернативті жоба номинациясы бойынша сынға түсесіз. Жеңістен үміттісіз бе?

– Үміт бар. Бірақ миыммен әлі де Нұрбекке, яғни deontheguitar-ға береді деп ойлап тұрмын.

«SHULAMAH» тобы:

– Иә, жеңіске үміттіміз. Бірақ бізге бастысы жеңіс емес, бізге осы сахнада шулау керек. Біз шулағанды жақсы көреміз!

Red carpet-тен өткен отандық жұлдыздардың біразы шорт-листпен таныспаған сыңайлы. Мәселен Назым Әбілдина Айгөлектегі әріптесі Еркеш Хасенге дауыс беретінін айтып, айды аспаннан түсірді. Үміткерлерге қатысты сұрағымыз Nurik Smitt-ті де абдыратқан сыңайлы.

Nurik Smit, музыкант:

– Кімдер лайықты. Мысалы, ең үздік жеке концерт?

– Қайрат Нұртас

Аталмыш жүлде үшінші жыл қатарынан өткізіліп жатыр. Ал биылғы премияның басты ерекшелігі - продюсерлер мен режиссерлерден тұратын 50 тәуелсіз бақылаушы ашық дауыс беріп, жеңімпаздарды анықтауында. Әділ-қазылар алқасының құрамына Али Оқапов, Роза Рымбаева, Динара Сатжан сынды мықтылар таңдалған.

Динара Сатжан, тележүргізуші, продюсер:

– Үздік топ номинациясында біршама таланттар бақ сынайды. Кім жеңіске жетеді?

– Әзіл ән, «Қайдасыңдар, тәтелер» Ghetto Dogs. Мен мектепте оқығанда шықты. Алматының реперлері. Менің ойымша, олар бүгін бір номинацияны алады.

Алдымен үздік поп-әртіс аталымының жеңімпазы анықталды. Say Mo, Yenlik пен Мархаба Саби бақ сынаған бұл номинацияда жеңіс Аyau-ға бұйырды. «Money» деп ән салып, black star-ды бағындырған аруға бұл ұнамаса керек марапаттау рәсімінің аяқталуын күтпей-ақ, залды босатты. Ал Аyau бастапқыдан-ақ өзінің жеңіске жететініне сенімді болған-ды.

AYAU, музыкант:

– Сіздің ойыңызша еліміздегі ең үздік поп-әртіс кім?

– Менің ойымша, мен.

Ал «Үздік топ» аталымы ИК-ға бұйырды. Алайда Ирина Кайратовна тобы марапаттау рәсімде бой көрсетпеді. Жігіттердің қолы тимеді ме, әлде келгілері келмеді ме, бұл бізге беймәлім. Бірақ статуэтканы алуға музыкалық продюсерлері Jamal мен Ganja шықты.

Бақтияр Құспеков, «ИК» тобының продюсері, рэп-орындаушы:

– Жеңіске жетеміз деп ойламадық. 3 номинация бойынша үздік деп танылдық. Әрі таңғалып әрі қуанып тұрмыз. Көп рақмет.

Alpha тобы болса «тыңдаушылар таңдауы» номинациясында топ жарды! Бұл кеште топтың жанкүйерлері ерекше қолдауымен есте қалды.

«Alpha» тобының жанкүйерлері

– Жігіттерді қашан да қолдауға дайынбыз және біз сіздерді жақсы көреміз!

Заманауи музыка жетістіктеріне арналған кеш Симфониялық оркестрлердің де еңбегін ұмытпады. Осылайша үздік инструменталдық жоба жүлдесі «Ne prosta orchestra» ұжымына бұйырды.

Мадияр Тойболды, «Ne prosta orchestra» ұжымының дирижеры:

– Өте керемет деңгейде өтті. Көп рақмет. Бұл премия біздің творчестваға, қазақтандағы музыкаға көп ықпалын тигізеді деп сенеміз.

Жас әнші Жаздаурен жыл серпіні атанды. Талант өзін ТМД-ға танытқан хитін орындап, көрерменнің ыстық ықыласына бөленді.

Сонымен, 6ELLUCHI -дің көбелегі жыл әніне лайық деп танылса, De lacure үздік рэп-артист атанды. Ал үздік альтернативті жоба Аrshat-тың қанжығасында. Нәтиже осындай. Ендеше барша жеңімпаздарды шын жүректен құттықтап, шығармашылық табыс тілейміз.