Аргентиналық футболшы 6-шы рет «Алтын доп» иегері атанды! Кеше ғана Парижде өткен салтанатты шарада «Барселона» клубының үздік шабуылшысы Лионель Месси өз ісінің хас шебері екенін тағы бір рет дәлелдеді. Аталмыш кеште Месси жары Антонелла Рокуццомен бірге бой көрсетті. Естеріңізге сала кетейік, бұл марапатқа таласқан, қоржынында 5 алтын добы бар тағы бір үміткер Криштиану Роналду болған. Ол Барселоналық футболшыдан 1 алтын допқа артта қалып қойды.

«Агент 007» қайтадан іске кірісті! Кинокомпания «Universal Pictures» британдық тыңшы жайлы туындыны «No Time to Die» деп атап, келер жылдың 9-шы сәуірінде қалың көпшілікке көз айым етпек. Аталмыш картинада басты рөлді әдеттегі Дэниел Крейг сомдаған. Бірақ актер бұған дейін 100 миллион доллар ұсынса да, түсірілімге келісім бермепті. Басты себеп, «ұзақ үзілістен кейін көрермен қабылдай ма екен?» деген қорқыныш болған. Түсірілімнің сәтті аяқталғанына қарап, Дэниел өз үрейін жеңгені көрініп-ақ тұр.

Күллі елді өзінің хит әндеріне билетіп жүрген 17 жастағы Билли Айлиштің жеке өмірі көпке қызық. Жақында ғана Билли Батыстық БАҚ-қа берген сұқбатында белгілі рэпер Дрейкпен желіде хат алмасып жүргені жайлы айтып қалған. Бірақ қарым-қатынастарының қай деңгейде екені белгісіз. Әңгіме барысында Айлиш 33 жастағы Дрейкті «Ең сүйкімді» адамға теңеген. Бұған дейін рэпердің 15 жастағы Милли Бобби Браунмен араласқаны мәлім болған еді.