Джастин Тимберлейк болса тыңдармандарын тың туындымен қуантуды қойған. Ол бүгінде актерлық қабілетін шыңдап, сол салаға көңіл бөліп жүр. Жиырмадан астам картинаға түсіп үлгерген әнші, сахнаға қашан оралмақ?

Бұл күні Джастин Тимберлейк 38-ге келді. Музыканттың 20 жылға жуық шығарамшылық жолында – ауыз толтырып айтатындай табыстары баршылық. Өз дәуірінде әлемге дүбір салған өнерпаз - «Эмми» марапатының 4 дүркін жеңімпазы және «Грэмми» сыйлығының 9 бірдей жүлдесіне ие болған.

Майкл Джексонға еліктеп өскен Джастин, билей алу қабілетімен де көпшілік көңілінен шыға білді. Алғашында «NSYNC» бойзбендінің мүшесі болған музыкант, 2000-шы жылдары жеке кетуге бел буды.

Джастин әншілікпен қатар, актерлық шеберлігін де дәлелдей алды. Оның түрлі картиналардағы сәтті рөлдері – көрерменнің оң бағасын еншіледі. Тіпті Тимберлейктің, фильмдегі рөлі үшін музыка саласында жеті жылдай үзіліс жасағаны бар.

Джастин Тимберлейк, әнші, актер:

-Менің тыңдармандарым мен кинодағы кейіпкерімнің жанкүйерлері бөлінеді деп ойламаймын. Менің шығармашылығымды сүйген адам, барлық өнерімді қолдайды.

Джастин, түрлі салада өз сүрлеуін салуға тырысқанын, автобиографиялық туындысында бүкпесіз баяндайды. Оның шығармашылық жолы жайлы кітап, өткен жылы жарық көрген еді. Сахна мен киноны тоғыстырған Тимберлейк, туған күніне орай жанкүйерлеріне жаңа бейнебаянын тарту етті. Енді Джастин – тыңнан шабыт тауып өнердегі сапарын жалғастырмақ ниетте.