«Марвелдің» адал жанкүйерлері болса, комикстардағы сүйікті кейіпкерлерінің киімін киіп, көшеге шықты. Олар дәл осылай, екі ай бұрын дүниеден озған Стэн Лиге деген құрметін білдірген! Қаптаған суперқаһармандар шеруінде жұлдыздар да жүр.

Шеруге шыққандар арасынан сан-алуан кейіпкерді кездестіресіз. Ол «Өрмекші адам», «Темір адам», «Капитан Америка», «Қара қабылан». Барлығы да Стэн Лидің ұшқыр қиялының арқасында дүниеге келген қаһармандар. Марвел әлемінің авторы өмірден озса да, оның есімі мен киноәлемінде қалдырған мұрасы ұмытылмақ емес.

Әйгілі жазушы әрі продюсерді еске алуға жиналған жанкүйерлер – шараны Лос-Анджелестегі Қытай театрында жалғастырды. Стэн Лиге құрмет білдірген қонақтар арасында танымалдардың да қарасы мол.

Taboo, «The Black Eyed Peas» тобының әншісі:

-Шынымды айтсам, ойын-сауық саласында өз есімін қалдырған санаулы тұлға бар. Ол – Джим Хенсон, Уолт Дисней және Стен Ли. Стен мені өзінің креативімен таңқалдырған тұлға.

Уэсли Снайпс, актер:

-Стен Лидің жұмыстары – бізге шалқар шабыт сыйлайды. Оның еңбегі арқылы шығармашыл жан болсаң, жерде қалмайтыныңды түсінесің.

Стен Лидің рухына тағзым етуге арналған кеш – игі мақсатта ұйымдастырылған. Шара барысында жиналған бар қаражат – комикс құраушы талантты авторлар мен жас компанияларға көмек ретінде берілмек.