Роза Рымбаева бүгінде әнші мен тыңдарман арасындағы қарым-қатынасқа сызат түскенін айтады. Халық әртісі қалың көпшілікпен қауыша қалса, өзін жайсыз сезінетін жағдайға жеткен. Роза Рымбаева, ҚР Халық әртісі: - Ән айтып тұрсаң, тіпті, үлкен сахнаға да көрермен шығып, соткасына суретке түсіп жатады. Бұл мәдениетсіздік деп санаймын. Жалпы әнші ән айтып тұрғанда, оның әнін тыңдау керек қой. Жоқ желкеңе де мініп алып, алдың да тұрып алып, сенің әнің емес, фотоға түсу керек болып тұрады. Мен кейде әнді тоқтатамын да айтамын - не суретке түсейік, не ән айтайық. Қарапайым қарашаның бұл қылығын Роза ханым мәдениетсіздікке баласа, Мақпал Жүнісова халықтың әншіге деген қошеметі деп біледі. Мақпал Жүнісова, ҚР Халық әртісі: - Мәдениетсіз деп айту дұрыс нәрсе емес! Халықтың әншіге деген сағынышы деп түсіну керек. Бұл әнші күнде келе бермейді ғой. Бес күндік жалған өмірде күнде бара бермейміз ғой бір жерге. Сондықтан да 2 жыл, кейде 10 жыл бармаған жеріміз бар. Сондайда ол кісінің сағынышын кеудесінен итергендей боласың. Тіпті, қаумалаған жұртқа еті үйренген жұлдыздар қауымы тойға бара қалса, тыңдарман тілегін орындауға әзір тұрады екен. Мәдина Сәдуақасова, әнші: - Тойларға біз барған кезде дайын боламыз. Тіпті бізбен суретке түспесе, бір түрлі болып қалатын жағдайлар болады. Менің ойымша онда тұрған ештеңе жоқ! Бірақ қомақты қаржыға келген өнерпаз «қолжетімді» деген сөз емес! Жұлдызбен сэлфиге түскен той қонақтарының қисынсыз қылықтары мұнымен шектелмейтін болса керек. Жеңіс Ысқақова, әнші: - Үлкен бір тойларда биге шақыратын адамдар бар. Сонда өте кедергі болады. Біз енді әнімізбен әлек болып тұрғанда, біз енді дұрыстап жеткізуіміз керек қой, әнімізді теледидарда көріп жүргендей қылып, сол деңгейде жеткізуіміз керек. Суретке түсіп жатып қалай ән айтасың?