«Бәріне Гала себеп!» Дәл осылай мәлімдеген Жансая мен Дидар отбасы тақырында ауқымды жоба ұйымдастыруына достары Ғалымжан Жанықұловның бойдақтық өмірі түрткі болғанын айтады.

– Әуелі Галаны бойдақтық өмірден отбасылы болуға шақыру болды, иә, мақсат?

Жансая Мұратбекқызы, стендап-комик:

– Дайындық десем болады кішкене кішігірім. Өйткені шынымен отбасылы өмірден қорқатын адамдар болады. Егер де бұл жобаның соңында Гала өзінің махаббатын тауып, онымен үйленіп кететін болса бұл біздің жобаның ең үлкен жетістігі болар бәлкім.

Бұдан бөлек, стендап сахнасының жалғыз аруы мен продюсері үйленгеннен кейін басталатын түрлі аумалы-төкпелі уақыттар, кризистік кезеңдер жайлы да сөз етпек. Басты мақсат - жұптарға ашық сөйлесу арқылы мәселені шешуге, ажырасудың алдын алып, отбасылық құндылықты дәріптеу.

Жансая Мұратбекқызы, стендап-комик:

– Бірінші кезекте отбасы құндылықтары және де алдыңғы аға буынмен, біз кейінгі буындардың арасындағы айырмашылықты көрсету. Өйткені, сырттан бәрі идеалды тұрғыда көрінеді.

Дидар Советбеков, «Qazaqsha StandUp» жобасының продюсері:

– Ең бастысы бір-бірін тыңдай алу ғой. Ол біздің де кемшілік шығар. Біз де мысалы 100 пайыз тыңдай алмаймыз. Біз де мысалы ұрсысамыз деген сияқты. Бірақ, соңына келгенде бәрібір бір шешімге келеміз.

Ал Қайрат Әділгерей мен Бақыт Тұрман керісінше, шаңырақта ыдыс-аяқтың сылдырауы қалыпты жағдай дейді. Олардың пікірінше, бұл жұптың бір-бірін түсінуіне, тыңдай алуына көмектеседі.

Бақыт Тұрман, Қ. Әділгерейдің жары, әнші:

– Таныстығымызға 26 жыл. Ал отбасылық өмірімізге 19-шы жыл кетіп бара жатыр.

Қайрат Әділгерей, актер:

– Енді отбасылық өмірде менің ойымша барлығы болады, болуы керек те. Конфликт болмаған отбасы да қызық емес секілід.

Қырыққа келгенде бір-біріміздің қызығымызды көріп жатырмыз деп әзілдеген жұлдыз жұп, жастарға отбасылық өмірдің қилы кезеңін қол ұстасып өту маңыздылығын айтты.

Бақыт Тұрман, Қ. Әділгерейдің жары, әнші:

– Біз кәдімгі тәжірибеміз бар отбасымыз! Бір-бірімізге уақыт көбірек бөле аламыз, бірге қыдыра аламыз. Бір жерге барсақ, бірге барамыз әрдайым. Бұрында жас кезімізде өзім бара саламын деп әйелін тастап кету деген болатын еді ғой. Қазір жоқ.

Қайрат Әділгерей, актер:
– Мысалы, әркімге «бүйтіңдер, бүйтіңдер» деп тағы да айта алмайсың. Өйткені, кейбіреулер жақсы көрмей тұра беред, енді бірі «түбі мен сені өлтіремін» деген оймен жүреді. Ал оны күйеуі байқұс білмейді, бақытты ғұмыр кешіп жүреді деген сияқты ғой енді...

– Барлығы сізге жазады «Қайрат ағаның қасында сіздің ішіңіз пыспайтын шығар, үнемі күліп жүресіз?» деп.

– Қайта, керісінше маған мына кісінің арқасында өміріміз қызықты. Себебі, аяқ астынан бір идеялар келеді, аяқ астынан бір шешім қабылдай салады. Бірақ шынында есейген сайын, жұбайыңа боқтап-боқтасып аласың да, «жүр, шай ішейік» дейсің. Ал жас кезіңде «сен маған неге өйтіп айттың?!» деп cөз көп таластыратынбыз.

– Енді Ғалымжан осы алған инсайттарыңа байланысты отбасылы болуға қаншалықты дайын екенсің?

Ғалымжан Жанықұлов, стендап комик:

– Негізінде дайын сияқтымын, бірақ енді адам дайын, дайын емес екендігін білмейді дейді ғой. Бастысы жауапкершілікті сезінсең, болашақ жарыңа деген жауапкершілікті барлық дайын сияқты.