Америкалық режиссер Джеймс Кэмерон авторлық еткен «Алита: Жауынгер періште» картинасы, отандық прокатта көш бастап тұр. Фантастикалық туынды айналымға шыққан алғашқы аптасында-ақ, «Брат или брак 2» фильмін шаң қаптырды.

Бірінші орынға жайғасқан «Алитаның» қоржынына 149 млн-нан аса қаржы түскен. Шытырманға толы лента, 300 жылдан кейінгі болашақты суреттейді. Идо есімді доктор, ұлы соғыстан кейін роботтың қалдықтарын тауып алып, қайта құрастырып, кеудесіне жан бітірмек. Құралай Анарбекованың «Брат или брак» комедиясының жалғасы екінші сатыда.

Кинопрокаттағы үшінші аптасында, фильм 38 млн теңгеге кенелді. Сүйген жарының жүктілігі кезінде, Айдар «Кувад» синдромынына шалдығады. Айгерімовті дәл осы қиыншылықтан, енді жұбайы Гауһар мен оның жақындары алып шықпақ. Үздік үштікті «Лего 2» мультфильмі түйіндеп тұр. Анимациялық туындыны, танымал актер Крис Прэт дыбыстаған.

Дания, Норвегия, Австралия және АҚШ елдері бірігіп таспалаған фэнтези, 32 млн теңгедей табысымен мықтылар көшінде. Майк Митчелл жетекшілік еткен картина, «Лего» ойыншықтарының бастан кешкен кезекті оқиғасын суреттейді. Кішкентай роботтарға енді, ғарыштан келген құбыжықтармен айқасу миссиясы сеніп тапсырылмақ.