Талантты кәсіпқой боксшымыз Данияр Елеусінов болса, алтыншы айқасына тас-түйін дайын. Рио олимпиадасының чемпионына, бұл жолы «мексикалық қиратушы» қарсылас атанды. Рингте атой салып жүрген жерлісіміздің, азулы бәсекелесі кім?

Данияр 29 жастағы Карлос Хименес есімді боксшымен қолғап түйістірмек. Мексикалық рингте 24 мәрте айқасып, оның 14-ін ұтқан тәжірибелі спортшы. Елеусінов АҚШ-тың Филадельфия қаласындағы бұл жекпе-жегін, 15 наурыз күні өткізбек. Отандасымыз кәсіпқойдағы 5 айқасының бәрін ұтқан, 3 нокауты бар. Бокс мамандары «Қазақ найзағайына»» бәсекелес болған «Қиратушыны», Даниярдың мансабындағы ең қауқарлы қарсыласы деп отыр.

16-наурызда IBO-ның халықаралық және WBC-ден Америка құрлығының чемпионы, талантты Батыр Жүкембаев, Канаданың Монреаль қаласында кезекті айқасына шығады. Қарсыласы әзірге белгісіз. Ол беделді #BoxRec рейтингінде бірінші жартылай орта салмақ дәрежесі бойынша – әлемдегі 2 мыңдай боксшының ішінде 22-орында тұр. Осы жекпе-жегін жеңсе, Батыр үшін АҚШ аумағындағы чемпиондық жекпе-жектерге жол ашылмақ. Ол қазір Нью-Йорк қаласында оқу-жаттығу жиындарын өткізуде.

24-наурыз күні қазақстандық кәсіпқойлар Айдос Ербосынұлы мен Нұрсұлтан Жаңабаев «Алматы арена» төрінде жұдырықтаспақ. Қазіргі таңда Айдос WBA Asia және WBO Global, ал Нұрсұлтан WBC Asia белбеулерінің иегері. Қос боксшы да осы атақтарын қорғап және өзге де титулдарға таласпақ. Ербосынұлы өз мансабындағы 10 жекпе-жектің барлығын жеңіп, 8 нокаут тіркеген, Жаңабаев болса, шаршы алаңдағы 6 кездесуінде де ұтылмай, 4 нокаутты еншісіне жазған.