Бұрын-соңды болмаған ерек шоу ұсынуға BRIT Awards ұйымдастырушылары да әзір! Әлемге әйгілі марапат өз үміткерлерінің есімін жариялады. Биылғы тізімде – Дуа Липа көш бастайды!
Музыканттар үшін ең елеулі саналатын сайыста – Дуа Липа төрт бірдей жүлде үшін жарысқа түспек. Олардың арасында «Үздік сингл» «Үздік бейнебаян» сынды көпке бұйыра бермейтін аталымдар да бар.
Джефф Тейлор, BRIT Awards бас директоры:
-Дуа Липаның бұл жылы да аянбай тер төккені баршамызға аян. Одан өзге, әнші Энн-Маридің де төрт бірдей аталымға үмітті болуы – үлкен жетістік. Меніңше, кім қалай еңбектенсе, соған сай жемісін жемек.
Британдық марапатқа үміткерлер тізімінде – Дрейк, Эминем, Шон Мендес пен Трэвис Скоттың да есімдері кездеседі. Олар ерлер арасындағы «ең үздік халықаралық әртіс» жүлдесіне таласпақ.
Бұл аталымды арулар арасында – Ариана Гранде, Жанель Монэ, Камила Кабейо мен Карди Би жеңіп алуға ниетті. Мұндай бәсекелестікте қай әншінің оза шабатыны кімге де болса қызықты.
Еске салсақ, «Грэммидің» ұлыбританиялық нұсқасы болып саналатын – Brit Awards жүлдесі, үздік музыканттарға 1977 жылдан бастап табысталып келеді. Марапаттың биылғы жеңімпаздары ақпан айының 20-сында белгілі болмақ!
