Отандасымыз Иманбек Зейкеновтың «Грэмми» сыйлығына үміткер атануы Қазақстан ғана емес, күллі ТМД үшін «жыл жаңалығы» болғандай! Оның

«Roses» әніне жасаған ремиксі шартарапқа тарап, бүгінде сұраныстағы тректер қатарына еніп отыр. Музыка майталмандарының айтуынша, туынды «Үздік ремикс» атануы әбден мүмкін.

Димаш Құдайберген де еліміздің мерейін асқақтатуда аянбай еңбек етіп келеді! Әлемді аузына қаратқан әнші «MTV USA»-ге сұхбат беріп, аталмыш арнадан оның «Qairan Elim» клипі көрсетілді. Бұл сұхбатты күллі диарс тағатын тауыса, сәт санап күткен-ді.

Данэлия Тулешованың халқаралық "America’s Got Talent" шоуына қатысып тыңдарманын таңқалтқанды тағы бар. Көпке арман болған мегажобада әнші «Көрермен көзайымы» марапатын еншілеп қайтты. Бұл байқау арқылы көп көрермен Қазақстанды тани бастағаны жасырын емес.

Әнші әрі актриса Индира Еділбаева болса, «Голос Украины» жобасына қатысып, талантын таразыға салған-ды. Кейіннен ол сайыстағы тәлімгері

Дан Баланның лейблымен келісім-шартқа отырып, қос өнерпаз «Дышат о любви» трегіне дуэт жазды.

Отандық орындаушылар бағындырған белес бұл ғана емес! Қарақат Башанова халқаралық «Junior Eurovision» байқауында бақ сынап, екінші орынды еншіледі. Жас өнерпаз алпауыт он елді артқа тастап, талантымен тыңдарманды таңқалтқан еді.

Кино саласының өкілдері де халқаралық жүлдеден кенде емес! Нақтырақ айтар болсақ, Жайдарбек Күнғожинов бастаған «Номад» каскадерлік командасының «Томирис» тарихи туындысындағы еңбегі еленді. Ұжым ондағы трюктер үшін каскадерлік арасында Оскармен пара-пар «Таурус» марапатын алды.