2021-ші жылы жеке әнші ретінде танылуды көздеген Аян Бірбаев мақсатына жету үшін қазірден бастап, шығармашылықтың қамына кіріскен. «Rin’Go» тобының мүшесі Ералы Нұртаза есімді өнерпазбен коллаборация орнатпақ. Шоу-бизнес өкілінің келер жылдан үміті көп.
Аян Бірбаев, «Rin’Go» тобының әншісі:
- Алты ән жазып тастадық бір бейнебаян түсірдік соның бәрін келесі жылы ақырындап шығарамыз. Ойымнан кетпейтін жаңағы жеке шығармашылық жасау керек жасау керек істеу керепін деген сияқты. Бірақ неге екенін әйтеуір қалдырып отырдым, келесі жылы, ертең тағы тағы ертең деп. Келесі жылға қалып отыр.
Алайда бұл «Бірбаев «Rin’Go» тобынан кетеді» деген сөз емес. Әнші бойзбендтегі шығармашылығы мен жеке әншілікті қатар алып жүрмек ниетте.
Ал жас әнші 2RAR болса, 2021-де өзін актер ретінде танытпақ. Өнерпаз бірден толықметрлі картина ұсынып, онда басты рөлді сомдауды жоспарлап қойған.
2RAR, музыкант:
- Қазір сценарий жазылу үстінде. Біз көктем айында, көктемнің бір айында түсіретін шығармаз. Толықметрлі енді ол октябрь, ноябрьде кинотеатрға шығады деген үмітіміз бар, «Ертегі емес» деген біздің толықметражды киномыз.
2RAR киноиндустрияда бағын сынаса, Бексултан Қазыбек өзін анимация әлемінде байқап көрмек. «Jokeasses» вайнерлер командасының мүшесі келер жылы мультфильм мен комикстерді жарыққа шығармақ ниетте.
Бексұлтан Қазыбек, блогер:
- 2021-ге көп жоспарларымыз бар. Бірнеше жаңа жоба, біздің жоспарымызы бойынша анимациялық бағытта жұмыс істеп көреміз ба деген ой бар және біздің ютубты да жалғастырамыз деп ойлаймын.
«Биыл уәдемізде тұра алмадық», - деген «Mad Men» тобы болса, келесі жылы фанаттары алдындағы кінәсін жуып-шаймақ. Q-pop өкілдері: «Карантин кесірінен жүзеге асыра алмаған жоспарларды 2021-де орындау қажет», - дейді.
REM, «Mad Men» тобының мүшесі:
-2021-ші жылға жоспарлар көп. Себебі 2020-шы жылға қойған барлық жоспардың барлығын басынан бастап бір кемшілік жерлерін, жалпы дамытып жасалмай қалған бір идеяларды осы 2021-ші жылы толыққанды жоспарларды қойып қойдық. Басты жаңалығы бұл альбом болады.
«Mad Men» тобы кезекті альбомына «Hikaya» деп ат таңдап қойған. Жинаққа жігіттердің 3 жылда топтастырған тректері мен карантинде жазылған су жаңа композициялары енбек.
