Азамат Зенкаев пен Ерке Есмаханның Дубайдағы демалысы біраздан бері ел талқысында еді! Енді Біріккен Араб Әмірлігінен де иглздар табылып, олар өнер өкілдерінің ізін аңдып, жұлдыздарды жасырын видеоға таспалауға кіріскен. Инсайдерлер ұсынған кезекті бейнежазбада Ерке мен AZ стендап-комик Нұрлан Сабуровтың кешіне бірге барғанын байқауға болады. Алайда, қос тарап жеке өмірлеріне қатысты әлі де қандай да бір пікір білдіруге құлықсыз.

Ержан Максим су жаңа бейнебаян ұсынды! «Қазақтың ұлдары» деп аталатын туындыны әнші ел мерейін асқақтатып жүрген жандар мен жалынды жастарға арнаған екен. Клипте «Алашұлы» тобы да бой көрсеткен. Ал, қашанда классикалық үлгіде киінетін Ержанның бейнебаяндағы қазақ батыры образы желідегі оқырманды сүйсіндірмей қоймады.

Динара Қырықбаева күйеуімен заңды түрде ажырасты! Әнші бұл жайында инстаграм парақшасында мәлімдеді. Үш баланың анасы қауесет сөздер болмас үшін барлығын өзі айтып беруге шешім қабылдаған. Әнші экс-жарымен ат құйрығын үзіскеніне бір жыл болғанын және бүгінде балаларының әкесімен жақсы қарым-қатынаста екенін жазды. Еске салсақ, Динара экс-жарымен 5 жыл бірге тұрған еді. Тіпті отбасы үшін сахнамен де қош айтысқан-ды.