Жанар Айжановадан өзге, Тәуелсіздік қарсаңында Ақордадан төсбелгі тағып қайтқандардың қатарында әнші Тоқтар Серіков те бар. Өнер иесі «ҚР Еңбек сіңірген қайраткері» атағын иемденсе, актер әрі шоумен Қайрат Әділгерей «Мәдениет саласының үздігі» атанды. Сондай-ақ, әлемге аты әйгілі Димаш Құдайбергеннің анасы, Нұр-Сұлтан қаласының әкімдігі жанындағы Мемлекеттік академиялық филармонияның әншісі Светлана Айтбаева мен айтыскер ақын Айнұр Тұрсынбаева «Құрмет» орденін алды.
Ал Айгүл Мүкей үшінші рет сәбилі болмақ! Танымал тележүргізуші жағымды жаңалығымен инстаграм парақшасында бөлісті. Тек ет жақындарымен бірге гендер пати ұйымдастырған медиатұлғаның қуанышында шек жоқ екені мына суреттен-ақ байқалады. Еске салсақ, 45 жастағы Айгүл Мүкейдің Асанәлі есімді ұлы мен Хабиба есімді қызы бар.
«Ninety One» тобы енді MTV жаңалықтарында! Актер әрі MTV NEWS арнасының иесі Кеван Кенни иглздың сұрауымен 91-ліктерден сұқбат алмақ. Кеван өзінің твитінде жанкүйерлерден келесі кіммен әңгімелесу қызық боларын сұраған. Нәтижесінде q-pop ұжымының фанаттар армиясы өз кумирлерін алға шығарды. Кенни болса, жуық арада Ninety one-мен байланысқа шығатынын мәлім етті. Еске салсақ, АҚШ-тағы танымал музыкалық арнаның басшысы бұған дейін Димаш Құдайбергенмен де интервью жүргізген болатын.
