Бұзық қыз Харли Квинн арамызға қайта оралды! Бұл жолы Джокердің құрбысы сүйіктісімен емес, жалғыз. Лондонда көптен күткен, DC Comics кейіпкері туралы таспаланған «Birds Of Prey» лентасының тұсауы кесілді.

Бұл күні, кинокешке күллі комикссүйер қауым келді десек, артық айтпаспыз! Арнаулы жолақты жағалай жиналған жанкүйер сүйікті кейіпкерлерін көңілді қарсы алуға тырысты.

Көп ұзамай, бас кейіпкер Харли Квинн, яғни Марго Роббидің өзі де қызыл кілемде төбе көрсетті! Фуксия түстес қолғаптарымен көзге түскен сылқым, кеште бақыттан бал-бұл жайнап жүр. Актриса мыңдаған камера оьбективі алдында бой түзеп, кейіннен табынушыларына қолтаңба таратуға кірісті.

Көп ұзамай, кинокартинаның өзге де өкілдері арнаулы жолақтан табылды.

Брайан Анкелесс, продюссер:

- Фильмге Сью екеуіміз ғана емес, Марго Робби да продюсерлік еткенін естеріңізге сала кетейін. Меніңше ол, әр ісін тыңғылықты орындап шықты. Лентадағы оның образы көрерменге ұнауы тиіс.

Су жаңа лентаның сюжет желісі бойынша, Харли Квинн жақтастарын жинап, қылмыс әлемінің серкесі Роман Сайониспен ашық айқасқа түспек. Еске салсақ, фильмнің жалғасында сылқым Джокермен ажырасып кеткен.

Марго Робби, актриса, продюсер:

- Фильмді таспалау, оның жұмысын ұйымдастыру, барлығы кермет өтті! Әр сәтіміз қызықты оқиғаларға толы болды. Әріптестерім туғанымдай болып кетті десем де болады.

Ал шытырманға толы лентаны отандық көрермен ақпанның 6-нан бастап үлкен экрандардан тамашалай алады!