Пандемияда музыкалық чарттарды бағындырып, күллі әлемге танылған Megan Thee Stallion бұл жетістігімен тоқтар емес! Былтыр «Billboard»-тың көшінен түспеген рэп орындаушы енді дебюттық «Good News» атты жинағын жарыққа шығарды. Енді, әнші алғашқы альбомына енген «Movie» трегіне бейнебаян ұсынып отыр. Еске салсақ, хип-хоп жұлдыз аталмыш тректі Lil Durk-пен орындаған болатын.

Биби Рекса болса, енді өзін лирикалық бағытта сынап көрмек. Сұраныстағы әнші «Sabotage» композиясына жүрек тебірентерлік клип таспалап, фанаттарының ыстық ықыласына бөленуде. Туынды күні кеше жарық көрсе де, ютуб платформасында 3,5 млн-ға жуық қаралым жинай алған.

Тик-ток арқылы әйгіленген Doja Cat америкалық әнші SZA-мен ерек коллаборация ұсынды. Талантты қос орындаушының «Kiss Me More» әні жарық көре сала, бірден хитке айналған-ды. Ал дәл осы трекке түсірілген су жаңа видео да көпшілік көңілінен шығуда. Онда «Анатомия страсти» телехикаясының жұлдызы актер Алекс Ланди басты рөлде.

«BrainStorm» тобы да тыңдарманына ерек клип ұсынды. Латвиялық ұжым «Feels» трегіне анимациялық нұсқада бейнебаян таспалаған. Мультфильм ретінде жарық көрген тың туындының идеясы «HonkFu» компаниясымен бірігіп 8 ай бойы әзірленген. Еске салсақ, 1989 жылы құрылған рок-ұжым 2020-да Евровидениеде таныстырған еді.