«Eurovision» байқауына Ресейдің атынан аттанатын үміткерлер қызу талқыға түсіп жатыр! Биыл ресейліктердің намысын «Little Big» тобы қорғайтыны белгілі болды. Бұл жаңалық көпті таңқалдырмай қоймағаны анық. Себебі, ұжым конурсқа бағытталмаған ерекше әндерімен тыңдарман арасында кеңінен танымал.

«Little Big» -ке танымалдылықты Skibidi трегі сыйлаған болатын. Еске салсақ, ғаламтор желісінде вирусқа айналған туынды тіпті флешмобқа жалғасқан еді. Ал, аталмыш бейнебаян бір аптаның ішінде YouTube желісінде 23 миллион қаралым жинады.

Десе де, «Little Big» рейв-тобын осал үміткер деуге әсте болмас. Себебі, олар бұған дейін Berlin Music Video Awards, Global Film Festival Awards сынды халықаралық марапаттарды еншілеген. Ал ұжымның «Евровидение» бақауында қандай ән шырқайтындығы жақын арада белгілі болмақ.

Конкурсқа сондай-ақ, Германиядан Бен Долич, Украиндан «Go_A» аттанбақ. Биылғы «Евровидение-2020» байқауы 12-16 мамыр аралығында Нидерланд елінде өткізілмек. Әнсайыс үшін бұл мерейтойлық 65-ші маусым.