Актер Нұржан Төлендиев болса, Виктор Цойдың образын айнытпай салды. Сондай-ақ, сахналық қойылымда «Кино» тобына да ерекше пародия жасалған. Өнер әлеміндегі танымал әрі талантты тұлғалардың ішінен әйгілі музыкантты сомдауына не себеп? Әзілкештің айтары бар!

Бір қарағанда Виктордың дәл өзі дерсіз. Шындығында әйгілі музыканттың кейпіне еніп, көрерменін тәнті еткен әзілдің майталманы – Нұржан Төлендиев! Актердың айтуынша, Цойдың образын таңдауы тегін емес. Кезінде атақты әртіс оның кумирі болған екен.

Нұржан Төлендиев, актер:

-Өйткені, мен бала кезімде осы кісінің фанаты болғанмын. Бала кезімде еліктегенбіз. Әрине, қазақтан садаға кетсін. Бірақ дегенмен де күлкілі болсын, халыққа күлкі сыйлау үшін бір құрал болды. Сол үшін қойдық.

Виктордың образын көпшілікке көрсеткен Нұржан, бұл қойылым арқылы Төреғалидың да жанды жерінен жаншып өткен секілді.

-Виктор Цой сахнадан шығып кетсін бе, ағайын?

Нұржан Төлендиев, актер:

-Ол енді қоғамдағы хит сөздер ғой. Пәленше кіріп кетсін бе, түгенше шығып кетсін бе деген қазіргі қоғамда, шоу-бизнесте, той думанда өте қатты жүріп жатқан сөз екен. Біз театр саласымыз ғой. Не істесек те, халық үшін ыңғайлы болсын деп жатырмыз.

Өмірде Төлендиев пен Төрештің сәлемі түзу! Актер астарлы әзілімен, қоғамның өз бидайын өзіне қуырып беруді құп көрген.

Нұржан Төлендиев, актер:

-Төреш – ол енді Алаштың ұлы ғой. Оған ешқандай қатысы жоқ. Жалпы қоғамдағы халыққа не керек, сол сөздерді қолданамыз. Біз сатирикпіз. Біз әзілкеш болғаннан кейін, халыққа әзіл сыйлаймыз.

Елдің езуін жиғызбайтын әзілкеш, кейде кереғар пікірлерді де естіп қалады. Бірақ, «халықтың сөзін ой елегімнен өткізіп, нәтиже шығаруға тырысамын»,- дейді.

Нұржан Төлендиев, актер:

-Өте ауыр сындар айтылады. Содан бір шешім шығаруға тырысамыз. Өйткені, «Халық айтса қалып айтпайды!» Ол сенің болашағың үшін. Халық сын айтса, сенің болашағың жақсы болсын деген үмітпен айтады.

Сынға сағы сынбаған сатираның саңлағы, бұл образдарымен тоқтап қалмақ емес. Нұржанның көпшілікке ұсынар келесі кейіпкері кім? Келешек көрсетеді!