Бри Ларсон «Капитан Марвелдегі» кейіпкері үшін, келер жылы «Оскар» алудан дәмелі. Ал бірер күн бұрын өткен әйгілі марапатта «екінші пландағы рөлі үшін» – актер Махершала Али үздік деп танылған еді. «Жасыл кітап» фильмінің жұлдызы туралы не білеміз?

Махершала Али қоржынындағы екінші «Оскарға» «Жасыл кітап» картинасы арқылы қол жеткізсе, алғашқы мүсіншесін 2017 жылы «Айдың сәулесі» атты драмасы үшін еншілеген еді.

Махершала Али 2001 жылы Дэниел Клейннің «Революционер»

фильмімен үлкен киноға алғашқы қадамын жасады. Мансабында 40-тан астам картинада бой көрсеткен актер, образдарының сан-алуандылығымен көрерменге ұнай білді. Ол әсіресе «Қатерлі ойындар», «Матрица» және «Бенджамин Баттонның құпиясы» туындылары арқылы көпшілікке кеңінен танымал.

Әуел баста баскетболшы болуды армандаған бала Махершала, кейін театр сахнасында өнер көрсеткен әкесінің жолын қуып, актер атануға бел буады. Али, түрлі телехикаялардың түсірілім алаңында да тәжірибеден өткен. Оның ең сәтті образдары «Құрамалы үй» және «Люк Кейдж» сериалдарына тиесілі.

45 жастағы киногер, екінші санаттағы рөлдерді сомдап келсе де, «Алтын Глобус», «АҚШ-тың актерлар гильдиясы» сынды бәйгелерде сан мәрте «үздік актер» марапатын иеленген. Махершаланың бүгінде көрерменге жол тартқан соңғы туындысы – Роберт Родригестің «Алита: Жауынгер Періште» фильмі.