Леди Гага мен Бредли Купер шырқаған «Shallow» трегі музыка тарихындағы ең көп жүлдеге ие болған туынды атанып отыр. Еске салсақ, бұл ән күні кеше «Оскар» жүлдесін еншілеген еді.

Леди Гага мен Купердің «Оскар» сахнасында әсерлі әуенді беріле орындағанын ел аузынан тастамай айтып жүр. Алайда, осыдан бір жыл бұрын Бредли табысты әнші атанады дегенге, ешкімнің сенбес еді.

Есесіне, құмарлана ән салған Купердың бағы бірден жанды. Нәтижесінде, ұзақ уақыт кино саласында тер төккен актер, «үздік ер адамның рөлі» үшін емес «үздік әуен» аталымы бойынша «Оскар» жеңімпазы атанды. Әсем әннің ажарын аша түскен де дәл Бредлидің қоңыр дауысы екенін Леди Гага да мойындайды.

Леди Гага, әнші, актриса:

-Жеңіс үшін Бредлиге алғыс айтқанымыз жөн болар. Себебі, мұндағылардың барлығы жақсы біледі, Бредлисіз ән дәл осындай болып шықпас еді. Оның ерек дауысы әннің көркін келтірді.

«Жұлдыз дүниеге келді» картинасының саундтрегі – бүгінде әлемдік музыка тарихында қатарынан 15 түрлі жүлде еншілеген тұңғыш туынды атанып отыр. Мәртебелі марапаттардың арасында, «Оскардан» өзге, «Алтын глобус» пен екі бірдей «Грэмми» сыйлығы да бар.

Талай әлемдік чарттың көшін бастаған әнге қатысты, ең мәртебелі музыкалық «Rolling Stone» басылыма да өз бағасын берген еді. Журнал бұл тректі 2018 жылдың ең үздік туындылар қатарына қосып, «классикалық роктың фэнтезиі» деп оңынан пайымдады!