Ариана Гранде «Грэмми» марапатында бой көрсетпеді. Өнерпаздың музыка мықтыларының арасынан табылмауына, бұл жобаға деген өкпе-реніші себеп болса керек. Есесіне арудың бірнеше күн бұрын жарық көрген «thank u, next» альбомы, рекорд орнатты.

Ариане Гранде «Грэмми» марапатында «Үздік поп-орындаушы» номинациясынан үмітті еді. Әнші қыз, бұл жолы салтанатты шарада өнер көрсетуден бас тартып қана қоймай, мүлдем бармауды жөн көрген. Себебі, жоба авторлары Гранденің қалаған әнін орындауына қарсы болған. Бикеш өзінің соңғы туындыларының бірі – «7 rings-ті» шырқаймын деген талап қойған.

Ариана, тыңдармандарына үздік екенін тағы бір мәрте дәлелдеді. Өнерпаздың «thank u, next» атты бесінші альбомы, «Spotify» музыкалық порталында 70 млн тыңдалыммен рекорд жаңартқан.

Әншінің су жаңа үнтаспасымен қатар, «break up with your girlfriend, i’m bored» трегіне бейнебаян жарық көрді. Әуен АҚШ-тың «iTunes» чартында көш бастап үлгерген. Бірден трендке ілінген клип, бірнеше күнде 44 млн қаралым жинады.