Өнерімен талайды тәнті еткен Леди Гага «Биллборд» тізімінде де үздік шықты! Әйгілі чарт музыка шеруіндегі мықтылардың есімін атады. Ең қызығы, тек саундтрек туындылар көш бастап тұр!

Өткен апта «Spider-Man» картинасының жалғыз саундтрегі ең үздік атанса, енді фантастиканың барша музыкалық туындылары «Биллбордта» оза шапты! «Өрмекші адам» лентасында шырқалған Рost Malone, Ники Минаж, Джейден Смит, XXXTentacion-нің тректері тұтастай альбомға жинақталған еді. Мұндай микс, тыңдарманға ұнап жатқандай! Әнтаспа сатылымы жағынан рекорд орнатуда!

Әсем әуендері арқылы жүректерге жол таба білгеннің бірі – «Жұлдыз дүниеге келді» фильмі. Еске салсақ, ондағы барлық тректі Леди Гага Бредли Купермен бірлесе жазған еді. Аталмыш альбомда басы-қасы 34 туынды тыңдай аласыз. Әншілік жолдағы алғашқы қадамы бірден «Билбордқа» жетелеген Бредлиге, бұл жетістіктен соң музыкамен кәсіби деңгейде айналысу жайлы ойланған жөн.

«Ұлы шоумен» мюзиклінің де өзгелерден қалысар ойы жоқ. Үздік ондыққа енген әнтаспа, уақыт өтсе де «сатылымы жоғары альбомдар» тізімінен кетпек емес. Еске салсақ, бұл әнжинақ 10-ақпан күні табысталатын «Гремми» марапатында «үздік саундтрек» аталымынан үмітті.