Снуп Догтың әріптестері де өнерпаз туралы өз ойларын ортаға салды! Олардың жылы лебізін білдіруіне – рэпердің өткізген кезекті концерті емес, Даңқ Аллеясынан арнайы жұлдызды еншілеуі себеп болды!

Елуді еңсеріп қалған Снуп Дог өнер әлеміне алғашқы қадамын 1992 жылы жасаған еді. Рэпер, продюсер әрі актер ретінде ел арасында танылған ол, айтулы шарада ең әуелі өзіне алғыс айтуды жөн көрді.

Snoop Dogg, рэп орындаушы:

-Өзіме деген сенімім үшін, өзіме алғыс айтамын. Қиын күндер, ұйқысыз түндер, талмай еңбек еткен сәттер үшін, түрлі тосқауылдарға қарамастан, шығармашылық жолдан таймағаным үшін өзіме алғыс айтамын. Иә, Снуп Дог сен өзіңді мақтайтын осындай жаман әдетің де бар!

Тарихи сәтте Снуп Догтың қуанышымен бөлісуге асыққандар көп болды. Голливудтық бульвар әртістің адал жанкүйерлерімен лық толса, оның жанынан өнердегі жақындары да табылды. Мәселен, музыкалық продюсер Куинси Джонс пен рэпер Доктор Дре өнерпазды құттықтай келгендердің қатарында болды.

Dr. Dre, рэп орындаушы:

-Снуп – тұнып тұрған талант! Меніңше, ешбір адам Снупты қайталай алмайды. Оның харизмасы мен стилі өте ерекше. Меніңше, жұлдыз болу оның маңдайына жазылған.

Әйгілі рэпер соңғы жылдары өзге салаларда да көзге түсіп жүр. Снуп Догтың отбасы Lupus Foundation қорымен серіктесіп, қайырымдылықпен айналысуда. Одан өзге, хип-хоп орындаушы аспаздық кітап шығарып, көпшілікті таңқалтқан еді.