Баянға тағы бір бәсекелес пайда болды. Ол өзінің бұрынғы шәкірті Әуелбекова. Продюсерлікті қолға алған Мөлдір, қыздар тобын құрып оны жақында жұртқа таныстырған еді. Алайда, әншінің жаңа жобасы бірден сынға ілікті. Гелзбендті көпшілік «Кешьюдің» көшірмесі дейтін көрінеді...
Әуелбекованың шәкірттері таңертеңнен кешке дейінгі уақытын, дәл осы дайындық бөлмесінде өткізуде. Вокалдан дәрісті Мөлдірдің өзі берсе, бұрымдылардың сахналық би қойылымдарымен арнайы хореограф айналысады. Өткен ауқымды іріктеудегі 400 үміткердің ішінен, топқа 4 қыз таңдалған.
Мөлдір Әуелбекова, әнші, продюсер:
- Төртеуінің бойлары бір-біріне жақсы келіседі. Екі қыз бір жерде оқыған болып шықты. Екі қыз бір-бірін әр түрлі ән байқауларында көріп, соңында барлығы бір-бірін танитын болып шықты.
«Назар» тобының құрамы 18 бен 21 жас аралығындағы арулардан тұрады. Бүгінде 7 жылдық келісім шартқа отырған қос тарап, қызу жұмысқа кірісіп кеткен. Бірақ, бұл жобадан жаңашылдықты байқамаған көпшілік «Кешьюдің көшірмесі» деп сынайтын көрінеді.
Мөлдір Әуелбекова, әнші, продюсер:
- Өйткені мен өзім топта болдым. Сол себепті салыстырады, салыстырсын. Олда бір өзінің септігін тигізеді. Мен одан қорықпаймын салыстырғаннан. «Кешьюдің» қазіргі бағыты басқа. Біздің бағытымыз басқа.
«Назар» тобы:
- Он жылдық тарихы бар үлкен топпен, жаңа топты салыстыру негізі дұрыс емес деп ойлаймын. Он жеті миллион халық болғандықтан, он жеті миллион адамның сонша түрлі ойы болады. Бәрінің неше түрлі пікірі бар... Бәріне бірден жағу оңай нәрсе емес. Негатив те бар...
Бірақ, жас қыздардың жігері жаншылмақ емес! Өйткені, Мөлдір Әуелбекова арулардың мұңаюына мүмкіндік бермейді.
«Назар» тобы:
- Қаталдық болған жерде тәртіп болады. Әрине, ұрсатын кездер болады. Иә, бірақ қатты емес! Біз ұрсатындай ештеңе істеген жоқпыз.
