Джейсон Деруло күллі командасымен Катар арқылы сағат түңгі екіде ұшып келіп, Алматы әуежайына қонды. Әлемдік супержұлдызға келе сала шапан жауып, құрмет көрсетілді, арнайы дастархан жайылды. Эксклюзив түрде НТК арнасына сұхбат берген ол, қазақтың мұндай қонақжайлығы тәнті еткенін айтады.
Джейсон Деруло, әнші:
- Айнадан өзімді көріп қалдым. Өте әдемі шапан, қуаныштымын. Шынымды айтсам, ең әуелі қазақтың ұлттық тағамдарын жеп көргім келеді. Одан бөлек, әрине жанкүйерлеріммен жүздесуге асықпын. Менің келуімді күткен жандар бар екенін білемін. Сондықтан, концертте барымды салуға дайынмын.
Еске салсақ, Джейсон Деруло ең алғашқы әнін небәрі 8 жасында жазған. 2007 жылдан бастап мансабын мықтап қолға алған ол, бүгінде әлемге әйгілі әртіске айналып отыр. Оның қоржынында «YouTube Music Awards» және «Teen Choice Awards» марапаттары бар.
Джейсон Деруло, әнші:
- Қазақстандық концертіме де кіл мықтыларды ерте келдім. Әлемнің ең үздік бишілері мен музыканттары десе болады. Бұл кешке ерекше дайындалдым.
Мадина Дәулетқызы, тілші:
- Қазір мен тректері трендтен түспейтін Джейсон Дерулоның концертіндемін. Байқағандарыңыздай әншінің өзі сахнаға шыққан жоқ. Ал тыңдармандар ақырындап жиналып жатыр.
– Көңіл күйіңіз қалай?
- Тамаша!
- Бұл концертке кіммен келдіңіз?
- Қарындасыммен.
- Қандай әндерін көп тыңдайсыз, жақсы көресіз?
- Атын білмеймін...
- Айтып бере аласыз ба?
- Уигл уигл уигл, тырытыты тырытыты сондай бар.
- Осы жерге кішкентай қарындасыммен келдім. Уатч сэй әні ұнайды.
– Сіз бұл концертке кіммен бірге келдіңіз, жалпы көңіл-күйіңіз қалай?
- Өте керемет, өзім келдім.
- Ал енді бүгінгі орындаушының қандай әндерін жақсы көресіз?
- Мен негізі оның Take You Dancing әнін жақсы көремін және көптеген әндерін білемін. Бірақ солардың арасында ең сүйікті әнім сол.
Дәл осы Take You Dancing трегінен өзге, бұл кеште Джейсон Дерулоның күллі хит туындылары шырқалды. Мәселен, осыдан он жыл бұрын жарық көрген Wiggle әні әлі де сұраныста. Ал америкалық әртістің хореграфиясын ерекше атап өтпеске болмас.
Джейсон Дерулоның әндері бүгінде YouTube платформасында 7 миллиардтан астам қаралым жинаған. Ал оның 13 трегі тыңдалымы жағанын платинаны иемденді. Әр альбомы хитке айналатын әртіс бүгінде кезекті жинағын дайындап жатқан көрінеді.
Джейсон Деруло, әнші:
- Менің су жаңа «New King» атты жинағым 16 ақпан жарық көреді. Соңғы альбомымды осыдан 5 жыл бұрын шығарып едім, сондықтан аздап қобалжып жүрмін. Бұл туынды бұрыңғыдан өзгерек. Себебі, ондағы тректерді чарт немесе танымалдық үшін емес, өзім үшін жаздым. Десе де, адамдар ондағы әндерден өзіне керегін алады деп үміттенемін.
