Құралай Башанова сынды, 2020 жылы өнерімен өрге жүзгендер жетерлік.

Мәселен, ремикс жасап, есімін елден жырақта танытқандар қатарында Моналдин бар. Мадиярдың K-Maro-ның «Femme Like U» композициясына ұсынған ремиксі Yandex.Music-те 2020 жылдың «Ең үздік электронды әні» атанды. Сондай-ақ, трек Shazam-да ең көп ізделген туынды ретінде Топ – 200-ге енді.

Садраддинді де «биылғы жылдың жаңа есімі» деуге толықтай негіз бар! Небәрі 17 жастағы өнерпаздың «Алия» трегі Itunes-та Топ -100-ке еніп, оған түсірілген бейнебаян Ютубта 3 млн-ға жуық қаралым жинаған. Сондай-ақ, Садрдың «Алиямен» қатар «Королева» трегіне жаз бойы Тик-Токта толассыз видеолар түсірілді.

Сондай-ақ, Дарикорн да жастар арасында бұл жылдың жаңалығы бола алғандай! Желі жұлдызы қызықты анекдоттары мен тиктоктағы видеолары арқылы біраз танымалдылыққа ие болды. Еске салсақ, бикеш таяуда ғана ақ келін атанып, әріптесі, блогер Дархан Жолшыбековке тұрмысқа шықты.

Бұл жылы шоу-бизнеске жаңадан қосылған 2RAR да Ютубтағы трендттен түспеді! Әнші аталмыш платформада «Ертегі емес» атты сериал ұсынып, онысы көрермен көңілінен толық шыққан-ды. Махаббат хикаясын баяндайтын туындыда Тұрардың тректері шырқалған еді. Өнерпаз енді «Ертегі еместі» толықметр етіп ұсынбақ ниетте.

2RAR - әнші:

- Қазір сценарий жазылу үстінде, біз көктемнің бір айында түсіретін шығармыз толықметрді. Келесі жылы октябрь, ноябрьде үлкен кинотеатрға шығады деген үмітіміз бар. Ертегі емес деген біздің толықметражды киномыз.