«Оскармен» пара-пар «Алтын Глобус» кинобәйгесі өз жүлдесіне үміттілерді жариялады! Жыл сайын дәстүрлі түрде өтетін дәл осы «Golden Globe Awards» шарасы биыл 77-ші рет ұйымдастырылмақ.

Ал көптен күткен тізімге енгендер есімін жариялау Тим Аллен, Дакота Фаннинг және Сьюзан Келечи Уотсонға бұйырған еді.

Сьюзан Келечи Уотсон, актриса:

- Баршаңызша сәлем! Киносарапшылар мен көрерменнің ыстық ықыласына бөленген фильмдерді анықтайтын сәт те жақындап қалды. Дәл осындай ауқымды шарада маған артылған сенім үшін алғысым шексіз. Ал, бастайық....

«Жыл фильмі» аталымы бойынша «1917», «Ирландық», «Джокер» және «Сәтсіз неке» фильмдері бақ сынайды. Ал «Үздік комедия, мюзикл» номинацияларында «Рокетмен», «Бір күні Голливудта», «Менің атым Долемайт» және «Пышақ кезеу» ленталары бар.

Дакота Фаннинг, актриса:

- «Үздік актер» аталымы бойынша: «Ford v Ferrari»-де басты рөлді сомдайтын Кристиан Бейл, «Сәтсіз неке» картинасындағы Адам Драйвер, «Джокердің» рөліндегі Хоакин Феникс және актер Джонатан Прайс үміткер атанды. Құттықтаймыз!

Ал «үздік актриса» аталымы үшін Синтия Эриво, Скарлетт Йоханссон, Сирша Ронан мен Шарлиз Терон сынды талантты бикештер таласқа түспек.

«Шет тілдегі үздік фильм» атағына өздерін лайықты деп санайтындар арасында «Қоштасу», «Даңқ пен дерт», «Паразиттер» және «Тұл қалған» фильмдері шорт-листке енген-ді.

Еске салсақ, осы аталым бойынша, үш бірдей отандық туынды лонг-тізімге енген еді. Олар: Ақан Сатаевтың «Томирисі», Ермек Тұрсыновтың «Шырақшысы» және Фархат Шариповтың «Тренинг личностного роста» туындылары. Алайда бұл ленталардың ешқайсысы «Алтын глобус»-тың қатаң іріктеуінен өте алмады.

Ал аталмыш марапаттың кіл мықтылары 2020 жылдың 5-ші қаңтарында белгілі болмақ!