Қазына Әбдіғаппар, @kazyna_91

- Оскарлы режиссерден тұсаукесер. Еліміздегі титулы көп режиссердің бірі - Әділхан Ержанов бүгін тағы бір туындының тұсауын кеспек. Дәл қазір әлемдік киногерлердің қошеметіне бөленген «Бой Атбая» драмасы қалың көрермен назарына ұсынылады. Бірге тамашалайық.

Биыл 35-ші рет өткен халықаралық Варшава кинофестивалінде Әділхан Ержановтың «Бой Атбая» картинасының тұсаукесері өткен болатын. Енді міне, шетелдік киносыншылардың оң бағасына ие болған тың туынды отандық көрерменге жол тартпақ.

Әділхан Ержанов, режиссер:

- Ең бірінші, жақында алған азиялық Оскарыңыз құтты болсын. Әсеріңіз қалай?

- Рақмет, көңіл-күйім жақсы.

- Фильм «Бой Атбая» көрерменге не береді?

- Білмеймін. Фильм сюжетті, әрі түсінікті. Көрерменді қызықтырады деп ойлаймын.

- Продюсер Серік Әбішов өзінің бір сұқбатында актерлер тегін түсуге келісті деді. Осы қаншалықты рас және құпиясын ашсаңыз, актерлердің ішінде кім тегін түсті?

- Бәріне төленді, мүмкін басқа жобаларына қарағанда көп деп айтуға келмес, бірақ «рақметіміз» айтылды. Ешкімді ренжітпеуге тырыстық, өйткені жобаның өзі аз бюджетке түсірілген. Оған түсіністікпен қарады.

Фильм сюжеті бұзақы жігіттің көше төбелесі бойынша турнирге қатысқан оқиғасы негізінде құрылған. Ал бас кейіпкер Атбайдың, яғни Данияр Алшыновтың лентадағы басты қарсыласы Рафаэль рөлін сомдаған – Санжар Мәди. Актерға ММА жауынгерінің образын ойдағыдай алып шығу үшін, түрлі жанкештілікке бас тігуге тура келген.

Санжар Мәди, актер:

- Әділханның жұмыстарын бақылап, өзім өмірдің кейбір шындығына көзқарасымды көре алдым. Оның айтар ойын сарказм, ирониямен жеткізуі ұнады. Сондықтан, дәл осы режиссермен жұмыс істегім келді.

- Фильмде сіз салмақ қостыңыз және шашыңызды өсірдіңіз табиғи жолмен, ия? Қанша уақытта өсірдіңіз?

- Өзімнің ұзын шашыма тағы шаш жалғады. Оның өзі уақытты алатын, аздап жағымсыз екен. Сырт пішіміме келер болсам, алдымен салмақ тастап, сосын арнайы диета және жаттығулар арқылы қайта қостым. Ал денедегі татуировакаларды қынамен 10 сағаттай боядық.

- Енді қазір өзіңіздің салмағыңызға келіп үлгердіңіз ба?

- Кішкене босаңсып кеттім. Бұрынғы қалпыма оралғым келеді. Жаттығу жасау керек.

Картина продюсері Әсел Сәдуақасова да лентада төбе көрсетеді. Актриса бұл жолы жағымсыз кейіпкер образында. Атбайдың басты қарсыласы - Рафаэльдің демеушісін сомдау бұйырған. Өз кезегінде продюсер әрі актриса

авторлық драманың кассалық жиынынан айтарлықтай үміт күтпесе де, көрерменнің көңілінен шықса дейді.

Әсел Сәдуақасова, продюсер, актриса:

- Көрермен осы лента арқылы мені, Санжар Мәди мен Данияр Алшынды жаңа кейіпте көргенін қалаймын. Өйткені көпшілік біздің комедиялық және экшн жанрындағы рөлдерімізге үйреніп қалған.

Артхауыстық туындымен танылған Әділхан Ержановтың көркем картинасы қаңтар айынан бастап үлкен экрандардан көрсетілмек.