«Бір болайық» жүректерді біріктіреді!
«Бір болайық» – НТК телеарнасының эфиріндегі ең танымал бағдарламалардың бірі. Жаңа отбасылардың өмірге келуіне атсалысуды басты мақсат еткен жоба бірнеше маусым бойы көрерменнің көңілінен шығуда. Бесінші тамыздан бастап «Бір болайық» жазғы демалыстан кейін экранға қайта оралды. Жаңа маусымда көрерменді не күтіп тұрғанын жоба жүргізушілері Камила Саян мен Шах-Керім Кәрменов айтып береді.
- Бағдарлама форматында қандай да бір өзгерістер бола ма? Әлде бәрі бұрынғыдай қалмақ па?
Шах-Керім Кәрменов:
- Әрине, алдыңғы маусымдардың тәжірибесін ескере отырып, қатысушыларды қабылдау және жобадан шығару процесіне өзгерістер енгіздік, бағдарламаға қатысу ережелерін өзгерттік. Жаңа ереже бойынша көрермендер қатысушыларды таңдау және шығару процесіне белсенді қатысатын болады.
- Қатысушыларды іріктеу қалай өтеді? Сіздер олардың анкеталарын мұқият зерттеп, сұхбаттар жүргізесіздер ме, әлде іріктеу кездейсоқ бола ма?
Камила Саян:
- Қатысушыларды іріктеу жауапкершілікпен қаралатын іс. Әрбір қатысушы тек отбасылық өмірге дайын ғана емес, халықтың белгілі бір тобының өкілі болуы керек. Сондықтан біз әр үміткердің анкетасын сұхбат кезінде мұқият зерттейміз. Іріктеу бірнеше кезеңнен өтеді. Қорытынды сұхбатта болашақ қатысушыны жүргізушілер, режиссер және редакция мүшелері әңгімелеседі.
- Бағдарламаға қатысушы болу үшін не істеу керек?
Шах-Керім Кәрменов:
- Жобаға қатысу үшін кәмелет жасына толу, тұрмыстық деңгейде қазақ тілін меңгеру, отбасын құруға ниет білдіру және әрине, некеде немесе қарым-қатынаста болмау жеткілікті.
- Сіздің ойыңызша, мықты одақ құруда ең бастысы не? Сәттіліктің сыры бар ма?
Шах-Керім Кәрменов:
- Шынында, сыр өте қарапайым. Біз қатысушының барлық ерекшеліктерін, соның ішінде кемшіліктерін де көрсету үшін барлық жағдайды жасауға тырысамыз. Қарапайым тілмен айтқанда, адамды еш бояусыз, қоспасыз көрсету керек. Осылайша, қатысушыны өмірлік көзқарастарын бөлісетін үміткер таңдау мүмкіндігі артады. Сәтті қарым-қатынастың сыры – өзің бола білу. Қалғанын қарым-қатынас кезінде шешуге болады.
- Сіздерге бір шығарылымда басты кейіпкерлердің мінезін ашып, қарым-қатынас орнатуға көмектесу керек. Жүргізушілердің мақсаты – жұптың міндетті түрде қалыптасуын қамтамасыз ету ме?
Камила Саян:
- Жоқ, ондай мақсатымыз жоқ. Біз үшін маңыздысы – адамдардың бір-біріне лайықтығын анықтау. Ақырында біз шоу жасап қана қоймай, жаңа отбасын құрамыз. Маусым бір жылдан аз уақытты алады. Біздің командамыздың мақсаты – мықты отбасылық одақ құру және жастарды отбасылық өмірде күтіп тұрған «тосынсыйлар» туралы ескерту.
Сіздер өз кейіпкерлеріңіз үшін уайымдайсыздар ма әлде эмоцияға бой алдырмай, бейтараптықты сақтауға тырысасыздар ма? Ер мен әйел арасындағы одақ құру – күрделі және өте маңызды процесс қой.
Камила Саян:
- Әрине, әрбір қатысушы бізге өзінше қымбат. Біздің жобамызға қатысы бар әрбір адам қалайда отбасымыздың бір бөлігіне айналады. Алайда біз, жүргізушілер ретінде, сабырлы болуымыз керек. Бізге жұппен жұмыс істеу көмектеседі. Егер Шах жағдайды еркекше суыққандылықпен бағалайтын болса, мен әйел ретінде, ситуацияға кіріп, толықтырамын. Соңғы шешімді әрбір тарап өзі қабылдайды, соның ішінде көрермендер де. Біз шынайылықты толықтай талап етпейміз және соңғы сөзді айту құқығымыз жоқ. Әркім өз таңдауын өзі жасауы керек.
Тұрмыстық зорлық-зомбылық тақырыбы туралы аздап сөйлесейікші. Жаңа кейіпкерлер, көбінесе ер адамдар, қыздарға қатысты талаптарын айтып жатады. Мәселен, не кию керек, қайда бару керек және т.б. Мұндай сәттерде сіздер не істейсіздер?
Шах-Керім Кәрменов:
- Сіз дұрыс айтасыз. Мұндай ситуациялармен жиі ұшырасамыз. Бірақ біз бұған бейтарап қарап, әрбір қатысушыға өз пікірін білдіруге мүмкіндік береміз. Дегенмен, басқа қатысушылар келіспеуі мүмкін. Мысалы, егер қыз кейбір ережелермен келіспесе, ол қарым-қатынасты жалғастырудан бас тарта алады. Біреу тұрмыстық зорлық-зомбылықты ақтаса, біз Қазақстан Республикасының қолданыстағы заңнамасына сүйене отырып, ескерту жасауға міндеттіміз.
- Жұп құрылғаннан кейін кейіпкерлеріңіздің болашақ тағдырына назар аударасыздар ма?
Шах-Керім Кәрменов:
- Әрине, біз құрған жұп үшін жауаптымыз. Тіпті маусым аяқталғаннан кейін де егер олар бізге жүгінсе, біз олардың қарым-қатынасына көмектесуге тырысамыз, Біздің мақсатымыз – жобада құрылған отбасылардың жақсы үлгі болуын қамтамасыз ету. Көбінесе солай болады, өйткені көптеген қатысушыларымыз өздерінің отбасылық өмірлері туралы әлеуметтік желілерде әңгімелейді.
Бүгінгі күні «Бір болайық» жобасының арқасында 25-тен астам отбасы құрылып, 20-дан астам нәресте дүниеге келді деп мақтанышпен айта аламыз.
- Бағдарлама жасаған кезде сіздер қандай мақсатты көздедіңіздер? Мысалы, отбасылық адамның мәртебесін арттыру, ажырасу санын азайту немесе демографиялық мәселелерді шешу ме?
Шах-Керім Кәрменов:
- Сіз дұрыс айтасыз, бұл міндеттер әлі де біздің алдымызда тұр. Бағдарламаның тағы бір мақсаты – қазақ тілін дамыту. «Бір болайық» – тікелей эфирде күнделікті 4 сағат, аптасына 6 күн шығатын қазақ тіліндегі алғашқы жоба. Көбінесе маусым басында қазақ тілін нашар меңгерген қатысушының ақырында тек қазақ тілінде сөйлейтінін көреміз. Қазақ тіліндегі жобалардың санының артуы және мемлекеттік тілді еркін меңгерген адамдардың санының өсуі бізге ұнайды.
- Сіздерді қазақстандық купидондар деп атауға болады, өйткені сіздердің жұмыстарыңыздың арқасында көптеген жұптар қалыптасты. Сіздердің жеке өмірлеріңіз қалай?
Камила Саян:
- Біз айтқанның бәрін өз отбасылық өмірімізде белсенді қолданамыз. Әрине, бәріміз адамбыз және көбінесе қатысушыларымыздан қатты ерекшеленбейміз. Біз де ренжісіп, татуласамыз, қателіктер жібереміз. Маңыздысы – қиындықтардан қашпау, қиындық тудырмайтын адамды табу. Біздің отбасылық өмірімізге қызығатындар оны біздің әлеуметтік желілерімізден біле алады.
- Қазір жалғыз жүргендерге және отбасылы адамдарға не тілейсіз?
Камила Саян:
- Жалғыз жүргендерге өз адамын тезірек табуды тілеймін. Ал отбасылыларға үйлерінде жылылық, жайлылық, адалдық және жақсы атмосфераны сақтауды тілеймін.
- Бағдарлама қаншалықты жиі эфирге шығады?
- Тамыз айында біз аптасына дүйсенбіден жұмаға дейін күнделікті 12:00-де 4 сағаттық тікелей эфирге шығамыз. Қыркүйектен бастап дүйсенбіден сенбіге дейін дәстүрлі эфир кестесіне ораламыз.
Автор Әсел Мираева