Әлемге әйгілі Billboard музыкалық чарты тректерімен тыңдалымы жағынан рекорд орнатқандарды анықтады! Үздіктер көшін туындысында карантин тақырыбын көтерген Дрейк бастайды.
Канадалық хип-хоп орындаушы көптен бері көрінбей кеткен еді. Сондықтан, Дрэйктің су жаңа «Toosie Slide» трегі оның күллі тыңдарманын қуантқандай! Еске салсақ, аталмыш туындының бейнебаянында карантин кезінде бос қалған қала мен зәулім үйлер көрсетіледі. Рэпер дәл осылай коронавирус өршіп тұрған кезеңде, жанкүйерлерін үйде отыруға шақырса керек.
Дрейктің шәкірті The Weeknd те Billbord тізімінен табылды. Хип-хоп орындаушының «After Hours» атты төртінші студиялық жинағы көпке ұнап жатыр. Әсіресе ондағы «Blinding Lights» трегі сөзсіз хит!
One Direction-дық Гарри Стайлз да үздіктер қатарында! Оның «Adore You» әні әлі де сұраныстағы тректер тізімінен түспек емес. Жарық көргеніне 3 ай болса да, туынды түрлі чарттарда көш бастап жүр. Қысқасы, соло әншілікке кетіп, шығармашылығына шыңдап кіріскен Гарридың өнерде жолы болды десек, артық айтпаспыз!
