«SAG Awards»-тың қызыл кілемінде жұлдыздай жарқыраған киногерлер, көп ұзамай кештің негізгі бөліміне де кірісті. Әйгілі марапаттың ашылуында сөз сөйлеу Леонардо ДиКаприоға бұйырды. Дәл осы сәтті пайдаланған талантты актер өнердегі ұстазына алғысын жаудырды.

Леонардо ДиКаприо, актер:

- Бүгін ортамызда отырған Роберт Де Нироға алғыс айтамын. Себебі, өнерге баулып, киноға жетелеген осы кісі. Менің әкем: егер кәсіби актер болғың келсе, Роберттен үйрен дейтін еді. Сіздің шеберлігіңізге тәнтімін.

Көсіле сөйлегенімен, Леонардо ДиКаприо бұл кештен құр алақан қайтты. Есесіне, оның «Бір күні Голливудта» фильмінде бірге бой көрсеткен әріптесі Брэд Питт «екінші пландағы үздік актер» жүлдесін еншіледі.

Брэд Питт, актер:

- Менің қоржыным тағы бір жүлдемен толықты! Барлықтарыңызға алғыс айтамын. Әсіресе, Лео бауырым сенің арқаңда кейіпкерімді мінсіз сомдап шықтым. Рахмет саған!

Кинокеште Брэд Питтің экс-жары Дженнифер Энистон да басты назарда. Актриса «Таңғы шоу» фильміндегі рөлі үшін «үздік актриса» жүлдесіне ие болды.

Дженнифер Энистон, актриса:

- О Құдайым! Сене алар емеспін! Қатты қобалжып тұрмын, түсірілім тобыма рахметімді айтамын. Кішкентай кезімде барлық бақытты сәттерімді таспаға түсіретін едім, соны қайта қолға алу керек шығар деп ойланып қалдым.

Ал «үздік актер» сөзсіз – Хоакин Феникс!

Хоакин Фенникс, актер:

- Бірнеше жыл бұрын осы жерде тұрған едім. Қайта оралам деген ой, үш ұйықтасам түсіме кірмепті. Барлығы көрерменнің ыстық ықыласының арқасы деп білем.

«SAG Awards»-тың басты жүлдесі «Паразиты» фильмінің авторларына бұйырды. Корейлік режиссер Пон Джун-Хоның трагикомедиясының ұжымы «Үздік актерлық құрам» атанып, премияның жеңімпаздары болды.

Сон Кан-Хо, актер:

- Мүмкін біз жаман фильм түсірген шығармыз. Себебі, онда шынайы өмір суреттеледі. Біз көрерменді арам пиғылдан аулау болуға шақырдық. Бұл батылдық деп білемін. Жоба авторлары жарайсыңдар!

Еске салсақ, аталмыш фильм «Канн» фестивалі мен «Алтын глобус» сынды кинобәйгелерде де өзгелерден оза шапқан еді. Тіпті лента «Оскардан» да дәмелі.