Америкалық әнші Лиззо кредитке жүгінбейтіні анық. Себебі өнерпаз өзінің су жаңа альбомымен пайдаға кенелуде. Күні кеше жарық көрген Лиззоның әнжинағы, бүгінде әлемдік музыкалық чарттардың көшінен табылды. Тіпті атақты Бейонсенің өзін шаң қаптырған.

Лиззо, алғаш 2013 жылы өзінің дебьюттық үнтаспасын жарыққа шығарған. Өнерпаз арудың шығармашылығына жәрдемдескен музыкант - Рикки Ридтің өзі еді. Сері, Лиззоның вокалдық жағынан өсуіне зор үлес қосыпты.

Лиззо 14 жасынан бастап, рэп әлемінде өскен. Құрбыларымен «Cornrow Clique» тобын құрған ол, дәл осы жанрда талай жыл өнер көрсеткен.

2014 жылы Тайм басылымы Лиззоны, ерекше музыканттардың біріне жатқызған еді. Себебі өнерлі бикеш дене бітімінің мінсіз еместігіне қарамастан, өзін сүйе білеуге шақырады.

30 жастағы әнші, өзінің бағын үлкен экрандарда да сынауда. Түрлі анимациялық туындыларда кейіпкерлерді дыбыстап жүрген дәл осы Лиззо.

Таяуда ұсынылған үшінші «Cuz I Love You» жинағы, бүгінде АҚШ-тың iTunes-інде үздіктер көшінде. 9 тректен тұратын альбом, Ұлыбритания, Канада және Австралияның ән платформаларына енген.

Лиззоның тың туындыларын тіпті, 9 түрлі мемлекеттегі музыкалық чарттардың үздік ондығынан таба аласыз.