Кино саласына тұңғыш қадамын жасаған Данелия, «The World's Best» шоуына қатысты алғаш рет пікір білдірді. Жеңіске жетпесе де, сайысқа қатысқаны үшін өкінбейтінін жеткізген жас өнерпаз енді қандай жобаларда бой көрсетпек?

Данелия «Әлемнің ең үздігі» атанудың аз-ақ алдында тұрғандай еді! Қазақстандықтар да тақым қысып, жас орындаушыдан көп үміт күтті. Бірақ, аталмыш жобада Төлешованың асығы алшысынан түспеді. Соған қарамастан, әнші қыздың көңіл-күйі көтеріңкі.

Данелия Төлешова, әнші:

-«The World's Best» маған үлкен тәжірибе сыйлады. Мен көптеген мықты адамдармен жұмыс істедім. Мысалы, Пинктің продюсері маған бірәз үйретіп, америкалық аудитория нені жақсы көретінін айтып берді.

«The World's Best-тен» соң Данелияның жанкүйері әлем бойынша еселене түскені жасырын емес. Десе де, танымалдықтың дәмін «Голос. Дети» байқауынан кейін таттым дейді өнерпаз.

Данелия Төлешова, әнші:

- Әрине, адамдар тани бастағанын жасырмаймын. Бірақ, халық мені дәл «Голос. Дети» бағдарламасынан кейін біле бастады. Сол сайыс болмаса, қазір дәл осылай сұхбат беріп тұрмас едім.

Осылайша, әр жобаның – жетістікке жетуге арналған баспалдақ екенін жақсы ұғынған Төлешова, түрлі ән байқауларына қатыса беруден жалықпайды.

Данелия Төлешова, әнші:

-Шынымды айтсам, әзірге білмейміз. Өмірді алдын-ала болжау мүмкін емес. Алайда, түрлі шоулар шақырту жіберсе, бас тартпаймыз.

Сондықтан, Данелия Төлешованың таяуда тағы бір халықаралық аламанда оза шапқанын көруге жанкүйерлері құштар.