Лос-Анджелесте «Дамбо» фильмінің тұсауы кесілді. Отбасылық фэнтезиді тамашалауға Анджелина Джолидің өзі келген. Актриса бұл жолы балаларымен бірге қызыл кілем бойымен шеру тартты.

Анджелина Джоли «Disney-дің» бұл туындысына ат салыспаса да, тұсаукесерге асыға жеткен жандардың бірі болды. Төрт бірдей баласын ерте келген актриса, дәл осы лентаны отбасымен тағатсыздана тосқандай.

«Дамбо» фэнтезиінде басты рөлдің бірін ойнаған Колин Фаррелл де картинаны алғашқы көрерменмен бірге тамашалады. Актер аталмыш фильмде циркке жетекшілік ететін Холта Фэрриер есімді сиқыршыны сомдайды.

Колин Фаррелл, актер:

- «Дамбо» мен үшін ерекше туынды. Бұл фильмді балаларға немесе ересертерге арналған деп бөліп жарудың қажеті жоқ. Себебі, жасы келген көрерменнің өзі, жан-дүниесінде балаша қуануды біледі.

Колинге құрбысы Ева Грин серіктес атанды. Қызыл кілемде ерек образымен көзге түскен актриса, жұрт назарын бірден өзіне аударды. Ал Ева үшін режиссер Тим Бертонмен бір түсірілім алаңында тер төгу – зор мәртебе екен.

Ева Грин, актриса:

- «Дамбоны» таспалаған Тим Бертон – өз ісінің нағыз маманы. Тим режиссер ретінде әрбір туындысында – қуанышты да, қайғыны да орнымен жеткізе алады. Тимның ерекшелігі де осы деп ойлаймын.

1941 жылы жарық көрген піл туралы анимациялық туындыны, толықметрлі фильм ретінде қайта ұсынған Тим Бертон, «Алиса ғажайып әлемінде» лентасымен елге етене таныс. Киногер бүгінде «Уолт Дисней» студиясымен әріптестік орнатқан.

Тим Бёртон, режиссер:

-«Дамбо» - «Дисней» үшін мен түсірген фильмдер арасындағы ең қарапайымы болса да, әмбебап картина шыққанына мен сенімдімін. Бастысы көрерменге түрлі эмоция сыйлай алады.

«Дамбо» – ұша білетін кішкентай пілдің хикаясын баяндайды. Ерекше жаратылған жануардың қасиеті, сиқыршылардың басты қаруына айналмақ. Фэнтези, 28-ші наурыздан бастап үлкен экрандарға жол тартады.