Ортақ қыз тәрбиелеп отырған Кайли Дженнер мен Трэвис Скоттың қарым-қатынасы болса қыл үстінде. Атышулы Кардашьяндар әулетінің кенжесі, сүйіктісінің өзіне опасыздық жасап жүргенін айтып жұртты шулатқан еді. Рэпер болса бұл сөзді жоққа шығаруда.

Кайли Дженнер сүйіктісінің адалдығына, ол кезекті ән сапарға кеткенде күмән келтіре бастайды. Рэпер жеке концертінде, Кайли мен кішкентай ханшайымы Стормиге тосын сый әзірлеуге уәде берген екен. Алайда музыкант жақындарын қуантуды тіпті ұмыт қалдырады. Күдігі күшейген сәнбике ғашығын жасырын көңіл көтеріп жүр деп айыптаса, Трэвис денсаулығым сыр берді деп ақталған көрінеді.

Рианнаның басы дауға қалды. Әншінің ресми түрде жарияланбаған туындылары «iTunes» платформасына жүктеліп кеткен. Белгісіз желі қолданушылары басы-қасы 12 туындыны, «Angel» атты альбомға жинақтап, жарыққа шығарып жіберіпті. R&B орындаушының бұл үнтаспасы 15 мемлекеттің музыкалық чартына еніп, Мысыр елінің ән шеруінде тіпті көш бастап үлгерген. Рири болса, тректерін өшірмек тастамақ ниетте.

Бен Аффлек экс-жұбайы Дженнифер Гарнермен ажырасқанына өкініп жүр. 46 жасқа келген актер, 11 жылдық қарым-қатынасынан кейін айрылысқан еді. Дегенмен, голливуд жұлдызының бұрынғы әйеліне деген көңілі әлі күнге суымаған екен. Бүгінде ішімдікке құмарлықпен күресіп жүрген Бенн, сәтін салса Дженнифермен қайта табысу үшін бар күшін салмақ.