Жақында ана атануға қамданып жүрген Меган Марклдың, сәбиі жайлы білуге миллиондаған жан құмартып жүр. Патша әулетінің салтына сай, болашақ нәрестенің ұл немесе қыз екендігін, күні бұрын болжауға тыйым салынған. Алайда Меганның жақындары ақсүйектердің ең кішкентай ұрпағы жайлы, біраз сырдың бетін ашты.

Меган Маркл таяуда Нью-Йорк қаласында жақын құрбыларына арнап «Baby Shower» рәсімін жасаған еді. Маркл бикеш бұл кеште түсірілген фото суреттердің таралып кетпеуін қонақтардан талап еткен. Алайда келген меймандар күні кеше естелік видеоларды желіге салған. Ал күлгін түспен безендірілген мерекеде бас қосқан Марклдың жақындары, Гарри ханзаданың тұңғышы қыз боларына сенімді.

Джеймс Кэмерон «Титаник» фильмінің естеліктерімен бөлісті. Режиссер 22 жыл бойы әйгілі кинотуындыдан қалған көліктің әйнегін сақтап келген екен. Фильмде актриса Кейт Уинслеттің саусақ іздері – кемеге тиелген көліктің терезесінде қалған еді. Өзінің твиттер парақшасында осы ескі қолтаңбаның суретін көрсеткен киногер, құнды жәдігерін кейін мұражайға бермек.

Брэдли Купер қайырылымдылықпен көзге түсті. Актер өзінің қол сағатын бәссаудаға қойған. Сері бұл қымбат бұйымын жақында өткен «Оскар» марапатына да тағып келген еді. Брэдли аукционнан түскен қаржыны «Антуана де Сент-Экзюпери» атындағы қорға сыйға тартпақ. Бұл ұйым денсаулығы нашар балаларды емдеумен айналысады екен.