Арнайы жолақпен жүріп өткен жұлдыздар кеште де түрлі қылық шығарды! Мәселен, «Ең үздік ән» аталымын еншілеген Леди Гага көз жасын тыя алмаса, режиссер Спайк Ли қуаныштан жанындағы жолдасына қарғып мінді. Одан қалса, киногер шарадан кетемін деп, біраз шу шығарған көрінеді.

Тарихта алғаш рет жүргізушісіз өткен «Оскардың» шымылдығын «Queen-дықтар» түрді. Әйгілі ұжым әсем әуендерінен паппури орындап, кеш қонақтарын бір ширатып алды.

Мәртебелі марапатты еншілеуден де, «Queen» тобы көш басында. Фреди Меркьюри өмірінен сыр шертетін «Богемдық рапсодия» - төрт бірдей аталымға лайықты деп танылған. Көп жүлденің бірі - байопиктегі актерлық шеберлігімен тамсандырған Рами Маллекке тиесілі.

Рами Малек, актер:

-Құдайым-ау! Менің анам осында болуы тиіс! Анашым мен сізді жақсы көрем! Отбасыма рахмет! Әкем қазір жоғарыдан бақылап отырған болуы керек.

Актердың әсерленгені соншалық, сахнадан түсіп бара жатқанда құлап та қалды. Тіпті, оған дәрігерлердің көмегіне жүгінуге тура келген.

Рами сынды, Леди Гага да толғанысын жасырып қалған жоқ! Бредли Купер екеуі «Жұлдыз дүниеге келді» лентасындағы «Shallow» трегімен «үздік ән» жүлдесін еншіледі.

Леди Гага, әнші, актриса:

-Барлығыңа рахмет! Егер, сіздер теледидардың арғы жағында тамашалап отырған болсаңыз, бұл ұзаққа созылған еңбектің нәтижесі. Сондықтан, ешқашан берілмеңіздер дер едім. Арманыңыз болса, соңына дейін күресе біліңіз. Рахмет!

Ең мықты деп танылған әсем әуен де кеш барысында шырқалған еді.

«Оскардың» «ең үздік фильм» аталымы «Жасыл кітап» картинасына бұйырды. Лентаның сценариі де әділқазылардың көңілінен шыққан екен.

Алайда, әріптестерінің бұл жеңісі Спайк Лидің ашуына тиген! Бас жүлде өзіне бұйырмаған соң, ол кеш аяқталмастан кетпек те болыпты. Тек «үздік бейімделген сценарий» жүлдесі өзіне табысталатынын естігенде ғана, режиссер сабасына түскен.