Спорт сынды, музыка саласының өкілдері арасында да бақталастық жетерлік! Әйгілі Биллборд чарты үздік альбом иегерлерін анықтады. Ең қызығы, бұл тізімде аты аңызға айналған «Backstreet Boys» жастарға дес берер емес!

Бәз-баяғы қауқары болмаса, да «Backstreet Boys-дық» жігіттер бұрынғы танымалдылығын кері қайтаруға құлықты. Ұзақ уақыттан соң араға қайта оралған ұжымның «камбэгі» әзірге жаман емес! Сахнаны сағынған серілер ән жазып, турнеге аттанып, шығармашылығына шыңдап кірісті.

Тіпті, бойзбенд өздерінің мерейтойлық, 10-шы әнжинағын тыңдарманға ұсынған еді. Басы-қасы 12 туынды топтастырлылған ««DNA» атты альбом, жарық көрген алғашқы аптасында-ақ, Биллбордтың көшін бастап отыр. Соған қарағанда, жанкүйерлер аты аңызға айналған әйгілі топты сағынғандай.

Америкалық хип-хоп орындаушы, Future мықтылар тізімінде екінші! Алайда, отыздан асқан рэпер үшін Биллборд чартынан табылу қалыпты жағдайға айналғандай. Талай трегі тыңдалымы жоғары деп танылса, бұл жолы оның «The WIZRD» жинағы көптің көңілінен шыққан екен.

Үздік үштікті «A Boogie Wit da Hoodie» тұйықтайды! «Hoodie SZN» рэп орындаушының небәрі екінші альбомы болса да, тыңдалымы мен сатылымы жағынан майталман музыканттардан қалысар емес. Онда хип-хоп орындаушының «6ix9ine, Offset, Tyga» сынды әріптестерімен шырқаған туындыларын тыңдай аласыз.