Құрамы өзгеріске ұшыраған «Moonlight» тобы, кейінгі сәтте көрінбей кеткен-ді. Тыңдармандарын сағындырған жігіттер, сахнаға қайта оралуды көздеп отыр. Ал өнерпаздардың ұзақ уақыт үзіліс жасауына не себеп?

Алғашында бес жігіттен тұрған топқа, Ерік Төленовтің кетуі қатты әсер еткендей. Жігіттер бір жыл бойы ел назарынан жырақта жүрген еді. Ұзақ уақыт үзілісте Еріктің орнын басар жанды іздеген өнерпаздар, тыңдарманнан да айрылып қалдық деп отыр.

Moonlight тобы:

-Негізі аудиторияны жоғалтып алдық деп айта алам. Біздің аудитория жоғалды негізі, өйткені енді әртіс сахнада көрінбегеннен кейін, кішкене адамдарда бәлкім тарап кеткен шығар деген ойлар келеді. Бізді негізі көбісі ойлайды тарап кетті деп. Бірақ, біз тараған жоқпыз, біз осындамыз.

«Moonlight-тық» жігіттерге топ құрамының өзгеруі ғана емес, продюсерсіз қалғандары да әсер етсе керек. Шығармашылықтың қыр-сырын меңгеру, біраз уақытты талап еткен көрінеді.

Moonlight тобы:

-Әрине қиындықтар ол барлық жерде бар ғой. Продюсермен болса да қиыныдықтар болады. Біз аз ғана болған жоқ сахнада жүргенімізге. Алты жылдай болды. Бәріміз өзіміз көріп, меңгеріп келе жатырмыз.

Көзден таса болған «Moonlight», енді жаңа альбоммен қайта оралмақ. Ұжым соңғы бірнеше айда үнтаспаны су жаңа тректермен толықтырған. Түрлі жанрды ұштастыра ән шырқайтын төрттік, сахнадан өз орнын қайта табуды көздейді.

Moonlight тобы:

-Жалпы өзіміздің бір бағытымызды жолымызды осы жолы таңдадық десек болады. Негізінде музыкалық тұрғыдан келетін болсақ, біз бір бағытқа жатқымыз келмейді. Яғни, поп немесе сол немесе джаз деген сияқты. Біз өзіміздің бір орнымызды жасадық.

«Moonlight-тың» алғашқы альбомы – басы-қасы 8 әннен тұрмақ. Жігіттер өздерін сағынған «айкезбелерге», тың туындыларын көктемде ұсынамыз деп уәде берді.