Карди Би – жолбарыстың кейпіне енді! Америкалық танымал рэп орындаушы, өзінің кезекті су жаңа бейнебаянын ұсынған еді. Алайда өнерпаздың туындысы көптің көңіліне жақпаған сыңайлы.

Карди Би тыңдармандарына арнаған «Twerk» атты туындысын, америкалық дуэт «City Girls»-пен бірігіп орындаған. Трек дәл осы топтың «Girl Code» альбомына енді. Әрбір әні хитке айналатын Карди Би, су жаңа бейнебаянында өзгеше образды таңдап қана қоймай, өзінің биге деген қабілетін барынша көрсеткісі келгендей. Бірнеше сағаттың ішінде 4 млн-нан астам қаралым жинаған туындыны, 9 мың адам ғана ұнатпаған екен.

Инди-поп жанрында шырқайтын әнші Элис Мертон, «Learn To Live» туындысына арнап бейнебаян түсірді. Композиторлықпен айналысатын ару, жиі саяхаттауының арқасында шабыт алатын көрінеді. Жаңа клипте түрлі сапарларын еске алған бикеш, тыңдармандарын батыл болуға шақырады.

Ариане Гранде болса табынушыларын үзбей қуантуды мақсат тұтады. Өнерпаз таяуда жарық көретін «7 rings» трегіне арналған бейнебаянның кадрларымен бөлісті. Шығармашылық жолын алғаш бродвейлік мюзиклден бастаған талантты ару, бүгінде әлемдегі музыкалық чарттардың үнемі көшін бастап жүр.