Марвелдың адал жанкүйерлері үшін де жағымды жаңалық! «Өрмекші адам: Үйден жырақта» картинасының киногерлері көптен күткен лентаның трейлерін ұсынды!

Франшизаның жаңа бөлімінде Питер Паркер сыныптастарымен бірге Еуропаға саяхатқа аттанбақ. Алайда, қаһарман кейіпкерді бұл жолы демалыс емес үлкен жауапты миссия күтіп тұрған еді. Енді, Өрмекші адам әлемді қауіпті құбыжықтардан қорғауы тиіс. Ал, Питер Паркерге игі іс жолында қызылкүреңді шапанның иесі – Мистерио көмекке келмек!

Еске салсақ, Өрмекші адам жайлы су жаңа картинадағы оқиғалар желісі - осы жылы жарық көретін «Кек алушылар: Соңы» фантастикалық туындысының жалғасы саналады. Алайда, Спайдерменнің кезекті бөлімінде Марвелдық қаһармандары төбе көрсетпейді.

Еске салсақ, франшизаның «Өрмекші адам: Үйге оралу» атты бірінші хикаясы табысымен таңқалтқан еді. $175 млн. АҚШ долларына таспаланған шытырманға толы картина жаһандық прокатта $900 млн қаржыға кенелген еді. Көпшіліктің пайымынша, суперқаһарман жайлы тың туынды кассалық жиыны бойынша рекорд орнатпақ.