Бредли Купер, Пенелопа Круз, Эмили Блант бастаған өнерпаздар мәртебелі марапат – «АҚШ киноактерлері гилдиясына» әзірленуде. Тіпті, әйгілі жүлденің мүсіншелері де дайын көрінеді. Көп жұлдыздың арманына айналған бұл сыйлық енді кімге бұйырмақ?

Санаулы күннен соң, 25-ші рет өтетін «АҚШ киноактерлері гилдиясы» сәтті образдарымен көзге түскен өнерпаздарды марапттайды. Айтулы салтанатқа жұлдыздармен қатар, ұйымдастырушылар да қызу дайындыққа кіріскен. Шараның маңызды нышаны – табысталатын мүсіншілер де назардан тыс қалмапты.

Гарри Шам, актер, АҚШ киноактерлері гилдиясының амбассадоры:

-Білесіздер ме, бұл мүсіншені ұстап тұрудың өзі қиын. Мен көрген жүлделердің ішіндегі ең ауыры десем де болады. Сыйлық кімнің қолына түсетіні өте қызық. Себебі, бәсекелестік тым жоғары.

Марапатқа үміттілер тізімінен табылып, көпшілікті таңқалдырған жанның бірі – Леди Гага. Киноәлеміне жаңадан қадам басқан жұлдыз, Эмили Блант, Оливия Колман сынды майталман кино актрисалармен бірге «үздік актриса» аталымына таласқа түспек. Ал, Гаганың «Жұлдыз дүниеге келді» картинасындағы серіктесі Бредли Купер болса, «үздік актер» сыйлығынан дәмелі.

Марго Робби, Эмма Стоун, Эми Адамстар болса, «екінші пландағы үздік актриса» атансақ та жаман емес деп отыр. Алайда, өнерпаздардың ішінен кімнің асығы алшысынан түсері, 27-қаңтар күні шымылдығын түретін салтанатты шарада белгілі болмақ.