Питбуль туған күнін тойлап жатқанда, музыканттың әріптестері өзара «Биллборд» тізімінде таласқа түсті! Алайда, бұл жолы Post Malone-ның асығы алшысынан түскендей!

Америкалық хип-хоп орындаушы мен Swae Lee-дің бірлесе шырқаған «Sunflower» трегі – чарттың көшін бастады. «Өрмекші адам: Әлем арқылы» лентасының саудтрегі саналатын бұл ән – қазан айында дүниеге келсе де көпшілікке енді ұнай бастағандай. Бұған картинаның жарық көруі мен табысқа жетуі де әсерін тигізіп жатса керек.

Аталмыш тізімде өткен аптада алғаш болған Холзи, бүгінде екінші.

Америкалық өнерпаз ару кезінде Тейлор Свифтің әніне кавер орындап, халық арасында танымалдылыққа ие болған еді. Есесіне, бүгінде Холзи, «Without Me» трегі арқылы талай майталман музыканттармен бәсекеге түсуге қауқарлы!

Қысқасы, бұл Холзидің «Биллборд» тізімінен табылған жалғыз туындысы емес! Әншінің Бенни Бланко, Калидпен бірге шырқаған «Eastside» әсем әуені де тыңдарманға жағуда! Сондықтан, үздік атанған үштік болашақта тағы бір туынды шығарып жатса еш таңқалмаңыз!