Актриса атанып, продюсерлік тізгінді қолына алған Ерке Есмахан, бұл күндері «Кафе махаббат» картинасын таспалауда. Біздің тілшіміз түсірілім алаңына арнайы барып, жұмыстың қалай жүріп жатқанын біліп қайтты. Әншінің сөзінше, барлығы бірден оңайға түспепті.

Кино әлеміне қадам басқан Ерке Есмаханды, Жамбыл облысының түкпіріндегі ауылдан тауып алдық. Хит әндердің орындаушысы атанған әншіден, бірден неліктен өзге салаға бет бұрғанын сұрап көрдік.

Ерке Есмахан:

-Адамда бір өсу болу керек қой, сондай сияқты мен өзім ойлана келе, ақылдаса келе неге кино түсірмеске. Гүлнұр Мамасарипова журналист, продюсер сол кісі маған кеңес берді. Сонымен былай ойландым да, шыны керек көп ойланған жоқпын, идея басыма түскен бойда жарқ ете қалды. Жоқ мен кино түсіруім керек.

Ал, менің жаңа кинотуындымды тек Асқар Ұзабаев таспалай алады деген Ерке, басында жаңа жұмысын біраз жатырқаған көрінеді.

Ерке Есмахан:

-Шыны керек, мен бас жағында үйрене алмай жүрдім. Ұйқым бар ұйықтамай жүрген. Оның қасында уайымдайсың, қалай бәрі болады деп. Бірақ, 2,3,4 күннен кейін кәдімгідей өзімді жақсы сезініп, осы атмосфераға кіріп, киноның қалжыңын түсіне бастадым.

Картинада Еркеге қарапайым ауыл қызының образы бұйырған. Түсірілім алаңында оның фильмдегі ағайын-туысы да қызу еңбектенуде.

Әбунасыр Серіков, актер:

-Мен Мақпалдың әкесінің рөлін сомдаймын. Мақпал деген біздің Ерке Есмахан. Жолдың бойындағы «Махаббат» кафесінде.

Отбасылық комедияның оқиға желісі дәл осы «Махаббат» кафесінде өрбиді. Ал, туысқандық қарым-қатынас, ғашықтық пен ауылдың аңғал атмосферасы суреттелетін картинаға, қажетті локация ұзақ таңдалған.

Шәріп Серік, актер:

-Жалпы ауа райы да бізге көмектесіп жатыр, осы ауылдың тұрғындары да бізге көмектесіп жатыр. Мысалы, мына түсіріп жатқан кафеде, әже күнде тамақ береді. Таза ауа, күнде жейтініміз ет. Салмақ жиналып жатыр.

Осындай жағымды да жанға жайлы ортада кино түсіруге кіріскен ұжым, көрерменге сәтті туынды ұсынады деп сенеміз!

Ерке Есмахан, әнші:

-Бұйыртса осы күзде «Кафе Махаббат» киносына  келіңізідер!