Қазына Әбдіғапбар, @kazyna_abdigapbar:

– Оның есімі ТМД-ға танымал үлкен музыкалық байқау, шоулармен қатар жүреді. Ерекше дауыс иесі, 10 жасынан бері өмірін ән әлеміне арнаған. Бүгін біз ресейлік талантты орындаушы Александр Панайотовтың соло концертіндеміз!

20 жылдан бері сахнада жүрсе де Алматы төріне жеке кешімен алғаш ат басын бұрған Александр Панайотов концертке тыңғылықты дайындалған. Өнерпаз қазақ халқының талғамына таңданысын жасырмады.

Қазына Әбдіғапбар, @kazyna_abdigapbar:

– Бұл Алматыдағы ең алғашқы үлкен концертіңіз. Халық қалай қарсы алды?

Александр Панайотов, әнші (Ресей)

– Алматылық тыңдарманның энергиясын, маған берген эмоциясын сөзбен айтып жеткізе алмаймын. Қазақстан мен үшін жер шарындағы музыкаға талғаммен қарайтын ең өнерлі халық бірі. Мұндағы әрбір жанның ұлттық жадында ән өнеріне деген ерекше мәдениеті байқалады.

Музыкант еліміздің отандық артистерін ерекше тілге тиек етті. Тіпті Александрдың плейлисті қазақстандық әншілердің шығармаларына толы екен.

– Плейлистімде қазақстандық музыканттар өте көп. Ашып көрсете де аламын. Тізім ұшан-теңіз. Сондықтан аттарын еске түсіре алмай тұрмын. Бәрінің әндері талғаммен жасалған. Өкінішке орай бізде ондай жандар аз.

Панайотовтың ән мансабының басым бөлігі музыкалық байқау мен шоудан тұрады. Өзін шыңдаудан шаршамайтын ізденімпаз сері биыл 40 жасқа толды. «Алматыға жастығымда көп келгенмін» деп, сахналас болған әріптестерін еске алды әнші.

– Ахмадиеваны танимын. Роза Рымбаеваның ұлы Әлиді де білемін. «Жұлдыздар фабрикасы» жобасына қатысқанда танысқанбыз. «Необыкновенная» әнін бірге орындаған едік. Батырхан Шүкеновпен де танысып достасып, бірге сахналас болып үлгергеніме қуанытшымын. Қазір айтып тұрып денем түршігіп кетті, өйткені керемет естеліктер көп.

Сөз арасында Александр Ресейде танысқан әнші Назиманы да сұрап қалды.

– Ол осында ма?

– Қазір иә.

– Осындай жерден шыққан таланттармен бірге ән жазу бұйырса, әсіресе өзім тыңдайтын, аты аталғандармен дуэт жазсам, бақытты болар ем. Сондықтан жазыңыздар, хабарласыңыздар мен тек қуанамын.

Кеш ұйымдастырушылары болса, атағы жер жарған талант иесінің қарапайымдылығына тәнті болғандарын айтады. Тіпті райдерінде де көзге түсер ерекшелік жоқ екен.

Григорий Шанин, ұйымдастырушы:

– Жеткен жетістігі мен атағына қарамастан өте қарапайым райдер ұсынды. Тәкаппарлық танытпай, бәрімізге кішіпейілдік танытқаны бәрімізді тәнті етті.

Артист бүгінде ТМД елдеріне тур бастап кеткен. Қазақстандағы кезекті кеш Астана мен қарағанды қалаларында болу керек болған. Алайда соло концерт келесі жылға ауыстырылыпты.

Александр Панайотов, әнші (Ресей)

– Өкінішке орай, белгілі себептерге байланысты Астана мен Қарағанды қалаларында өтетін жеке кешім келесі жылдың мамыр айына ауыстырылды. Сіздерді міндетті түрде күтемін. Бүгінгі кештен алған ләззаттымды тағы да сезінгім келеді. Сыйқырға толы концерт болады деп сенемін.

2 сағатқа созылған музыка әлеміне саяхат настольгияға толы болды. Сүйікті әншісін ұзақ күткен Алматылық тыңдарман Панайотовты жібергісі келмей, қимай қоштасты.