Тағы бір суперқаһарман! Лос-Анджелесте «Stargirl» фильмінің тұсауы кесілді! «Disney» студиясы мен «DC Comics» бірігіп ұсынған лентаны алғаш болып тамашалау үшін келгендердің қарасы мол болды.

Бұл кеште басты жұлдыз – актриса әрі әнші Грейс Вандервол. Су жаңа фантастикалық фильмде басты рөлді сомдаған бикешке фотографтар тыным бермеді. Еске салсақ, өнерпаз ару 12 жасында «America’s Got Talent» шоуының жеңімпазы атанып, танылған еді.

Грейс Вандервол, актриса:

- Бұл фильм өз-өзін іздеп жүрген жандарға арналған деп айтар едім. Себебі, менің кейіпкерім өмірдегі орнын іздемек. Әсіресе жас көрермендер үшін берер пайдасы зор. Тек бізбен бірге болыңыздар!

«Батыр қыздың оқиғасын баяндайтын лентанының тұсаукесерін тағатсыздана тостық», - дейді жоба авторлары. Түсірілім тобы суперқаһарман жайлы туынды көпті қызықтыра алатынына сенімді.

Грэм Верчер, актер:

-Мен үшін бүгін ерекше күн. Қатты қобалжып тұрғанымды көріп тұрған шығарсыздар. Біздің қуанышымызды ортақтасу үшін осыншама адам келеді деп ойлаған жоқпын. Енді көрермен фильмге өз бағасын берсе екен деймін.

Ал «Жұлдызды ару» лентасы мектеп оқушыларының бастан кешкен оқиғасын баяндайды. Футбол ойыны кезінде бас кейіпкер суперқаһармандық күшке ие екені анықталады. Кейіннен «Stargirl» өзінің бұл қасиетін бұзақылармен күресу үшін қолданады. Лентаның сюжетіне америкалық жазушы Джерри Спинеллидің кітабы негіз болған.

Джанкарло Эспозито, актер:

- Мен тіпті фильмнің түсірілім барысында достарыммен бәсекелестім. Себебі, мен «Жұлдызды қыз» туралы кітаптан оқыған едім. Маған ешкім сенген жоқ. Бірақ мен өз кейіпкерімнің образын сценарийга қарамай-ақ білген едім.

Фантастикалық лента, кинотеатрларда наурыз айында жарық көруі тиіс еді. Алайда «коронавирустың» кесірінен, фильмнің көрсетілімі кейінге шегерілді.