«Бэтмен» енді жоқ! «DC Comics» суперқаһарманының образымен танылған Бен Аффлек енді спортшының кейпінде. Голливуд жұлдызы Лос-Анджелес қаласында өзі төбе көрсеткен «Ойыннан тыс» фильмінің тұсауын кесті.

Бұл күні қызыл кілемнің басты жұлдызы атанған Бен Аффлек ұзақ уақыттан бері көзден тасада болған еді. Еске салсақ, актер ішімдікке деген құмарлығының кесірінен кино әлемінен біраз уақыт қол үзген-ді.

Бен Аффлек, актер:

- Маған бұл фильм жаныма жақын көрінді. Себебі, лентада мен әр түрлі қиындықпен күресемін. Мұндай жағдайлар әрбір көрерменнің өмірінде болып жатады. Тек күресу жолымыз бір-біріне ұқсамайды.

Бен Аффлек басты рөлді сомдаған туынды спорт тақырыбында. Драма Джек Каннингэм есімді баскетболшының бастан кешкен оқиғасын баяндайды. Өз ісінінің маманы атанған спорт жұлдызы, есірткі мен ішімдікке салынуының кесірінен барынан айырылады. Алайда, өмірден түңілген серіге тағдыр тағы бір мүмкіндік сыйлайды.

Мелвин Грегг, актер:

- Түсірілім тобына рахмет. Себебі, спортқа деген махаббат әрбір адамды аяқтан тұрғызады. Бұл сөзсіз, сен баскетбол ойнасаң барлық мәселеңді ұмытасың. Күш жігер береді. Мен бұл жобадан көп нәрсені үйрендім.

Режиссер Гэвин О’Коннор таспалаған картинада Бен Аффлектің сүйіктісін Янина Гаванкар сомдайды. Өнерпаз ару талантты актермен бір фильмде бой көрсету мен үшін құрмет деп отыр.

Янина Гаванкар, актриса:

- Бен өте керемет әріптес болды. Түсірілім барысында біз жақын дос болып кеттік. Бұл туындыны көрген көрермен өзіне керегін алады деп ойлаймын. Тек спортты жаны сүйетіндер ғана емес, барлық адам көрсе екен деймін.

Ал су жаңа спорттық драма отандық көрермендерге 5-ші наурыздан бастап жол тартпақ.