Талантты киногер «HBO» компаниясы таспалаған «Мінсіз» атты драмада бас кейіпкер атанған еді.Хью Джекманға бұл жолы арам пиғылды ұстаздың образы бұйырған. Беделді мектептің оқытушысы атанған ол, жемқорлықпен айналысып жүреді. Алайда профессордың мұндай құйтұрқы әрекетіне жас репортер бөгет болады. Туынды 25-ші сәуірден бастап жарық көрмек.

Шейлин Вудли мен Джейми Дорнан қос ғашықтың кейіпіне енді. Голливуд жұлдыздары су жаңа «Үш жанға бір махаббат» атты мелодрамада бой көрсетпек. Режиссер Дрейк Доримустың фильмінде сондай-ақ, актер Себастьян Стэнде де қатыспақ. Лентаның сюжет желісі, суретші қыздың екі бірдей жігітке ғашық болып қалуынан басталады.

Эмили Блант та көрермендерімен қайта қауышпақ! Әйгілі актриса «Тыныш жер» фильмінің екінші бөлімін ұсынады. Ал, хоррор жанрындағы картинаның режиссерлық тізгіні Джон Красинскиге бұйырған болатын.

Үрейлі лентада отбасы қатты дауыс шығармай, үнсіздікте өмір сүруі тиіс. Бұл шартты орындамаған жағдайда, тылсым күштер оянып, жанұяның тыныштығын бұзады. Еске салсақ, туындының алғашқы бөлімі 2018-шы жылы жарық көрген еді.