Отандық кинопрокатта кассалық табысымен топ жарған фильмдер тізімі анықталды! «Ticketon.kz» сайтының мәліметінше, өткен уик-эндте көрермен «Джентельмендер» фильмін таласа тамашалаған.

Айналымдағы алғашқы аптада-ақ көш бастаған криминалды лента 76 млн теңгеден аса пайдаға кенелді. Әйгілі режиссер Гай Ричи таспалаған туындыда Мэттью МакКонахи, Хью Грант, Колин Фаррелл және Генри Голдинг сынды танымал актерлар басты рөлде.

Сюжет желісі бойынша, Оксфорд университетінің үздік түлегі ақсүйектер ортасына түседі. Ол қулығының арқасында есірткі бизнесін дамытпақ болады. Алайда серінің бұл қылығын детектив әшкерелейді.

Ресейлік «Мұз» драмасының жалғасы екінші сатыда. 27 млн-ға жуық кіріс көрген фильм, мәнерлеп сырғанау өнеріне ғашық болған кішкентай қыздың спорттағы алғашқы қадамдары туралы баяндайды.

Ресейдің жарық жұлдыздарына айналған Александр Петров және Аглая Тарасова төбе көрсеткен фильм, отбасы арасындағы сенім мен ет жақыныңды қолдаудың маңыздылығын көрсетеді.

Су жаңа «Дәрігер Дулиттлдің ғажайып саяхаты» лентасымен үлкен экрандарға қайта оралған Роберт Дауни-Кіші үздік үштікте. Голливуд жұлдызы бұл жобасымен 25 млн теңге табыс тапқан-ды.

Режиссер Стивен Гейган таспалаған тың туынды мал дәрігері Дулиттлдың бастан кешкен оқиғасын баяндайды. Жануарлармен сөйлесе алатын қабілетке ие бас кейіпкер емдік дәрі іздеу үшін кезекті саяхатқа аттанады. Маңызды миссия барысында оған түрлі хайуанаттар жәрдемдеседі.