Өткен уик-эндте кассалық жиынымен рекорд орнатқан фильмдер тізімі анықталды! Көрермен көңілінен шыққан туындылар көшін – «Джуманджи: Жаңа деңгей» фильмі бастайды.

«Тicketon.kz» сайтының мәліметінше, айналымдағы алғашқы аптада-ақ бірінші сатыға жайғасқан шытырманға толы фэнтези 397 млн-нан аса қаражат тапқан. Дуэйн Джонсон басты рөлді сомдайтын лента сиквелдың екінші бөлімі.

Сюжет желісі бойынша, кейіпкерлер виртуалды әлемге еніп, Джуманджи тұрғындарын құтқару үшін барын салады.

Ғаламтор жұлдызына айналған Әбунасыр Серіков екінші сатыда! Актер басты рөлді сомдаған «Хайп қуған ата» комедиясы 146 млн пайдаға кенелген.

Жеңіл әзілге құралған фильмде жұмысынан айрылған қария, ақша табамын деп жастарға еріп, вайн мен пранк түсіреді. Осылайша ақсақал өзі ойламаған жерден ғаламтор жұлдызына айналады.

ТОП үштікті «Мұзды өлке» мультфильмінің жалғасы тұйықтайды! Анимациялық лента бұл аптада 134 млн теңге кіріс көрді. «Дисней» ұсынған туындының табысы бүгінде әлем бойынша 1 млрд долларға жеткен.

Көрерменімен қайта қауышқан әпкелі-сіңлілі Анна мен Эльза тағы бір қызықты әрі қауіпті оқиғаны бастан кешіреді. Енді, ханшайымдар «Эренделл» патшалығын құтқаруы тиіс.